पौडेललाई राजाजस्तो राष्ट्रपति होइन, नागरिक राष्ट्राध्यक्ष बन्न थापाको सुझाव

काठमाण्डाै,२६ फाल्गुन। नेपाली कांग्रेसका महामन्त्री गगन थापाले नवनिर्वाचित राष्ट्रपति रामचन्द्र पाैडेललाई राजाजस्तो राष्ट्रपति नभई नागरिक राष्ट्राध्यक्ष बन्न सुझाव दिएका छन् ।

महामन्त्री थापाले आज शुक्रबार सामाजिक संजालमा लेख्दै नवनिर्वाचित राष्ट्रपति पाैडेललाई ५ बुँदे सुझाव दिएका हुन् । महामन्त्री थापाले पार्टीकाे तर्फबाट राष्ट्रपतिकाे उम्मेदवार बनाउँदा भनेकाे र राखेकाे अपेक्षालाई कार्यान्वयनमा लैजान सुझाव दिएका छन् ।

उनले नेपालको राष्ट्रपति, राजा वा राजसंस्थाको अधिकारलाई प्रतिस्थापन गरेर बनेको वा त्यो संस्थाको निरन्तरता नभएकाे बताएका छन् । उनले भनेका छन्, ‘रामचन्द्र पौडेललाई राजाजस्तो राष्ट्रपति होइन नागरिक राष्ट्राध्यक्षको रूपमा हेर्ने हाम्रो इच्छा छ ।’

महामन्त्री थापाले हाम्राे राष्ट्रपति संवैधानिक भएकाे र संविधानले नै राष्ट्रपतिका कामलाई दिशा निर्देश गरेको बताएका छन् । उनले संविधानको परिधिभित्र रहेर राष्ट्राध्यक्षका रूपमा राष्ट्रपतिले प्रधानमन्त्रीलाई सल्लाह, सुझाव र आफ्नो दृष्टिकोण दिन सक्ने तर प्रधानमन्त्रीको अधिकारमाथि कहिल्यै हस्तक्षेप नगर्नेतर्फ पनि सचेत गराएका छन् ।

महामन्त्री थापाले विशिष्ट व्यक्तिको सवारी सुरक्षा दिने नाममा सडक खाली गराएर नागरिकलाई घण्टौँसम्म हिँडडुल गर्न नदिने परम्परा, अभ्यास र तामझामपूर्ण शैलीले संस्थाप्रति नै नकारात्मक धारणा विकास हुँदै गएको बताउँदै राष्ट्राध्यक्षको नाममा विगतमा जस्तो अनावश्यक तडकभडक नगर्न, सरल र सादगी जीवनशैली, अनुसरण गरी नागरिक राष्ट्राध्यक्षको रूपमा आफूलाई राख्न पनि पाैडेललाई सुझाव दिएका छन् ।