जनताको वास्तविक समस्या समाधान गर्न प्रदेश सरकार प्रतिबद्ध छः मन्त्री तामाङ

चितवन, असोज २९ । बागमती प्रदेश सरकारका स्वास्थ्य तथा सामाजिक विकासमन्त्री गिरबहादुर तामाङ (ज्ञानुजंग लामा) ले जनताको वास्तविक समस्या पहिचान गरी तिनको समाधान गर्न प्रदेश सरकार प्रतिबद्ध रहेको बताउनु भएको छ । भरतपुर महानगरपालिका–२०, चनौलीमा थारु महिला अगुवा समाजले बडादसैँ २०८३ को अवसरमा आयोजना गरेको शुभकामना आदानप्रदान तथा भेटघाट कार्यक्रमलाई सम्बोधन गर्दै मन्त्री तामाङले सरकार जनताका समस्या समाधान गर्ने दिशामा लागिरहेको बताउनु भएको हो ।

कार्यक्रममा बोल्दै मन्त्री तामाङले जनताको आवश्यकता र समस्यालाई प्राथमिकतामा राखेर काम गर्नुपर्नेमा जोड दिनुभयो । जनताले प्रत्यक्ष अनुभूति गर्न सक्ने गरी विकास निर्माण तथा सामाजिक सुधारका काम अघि बढाउनुपर्ने उल्लेख गर्दै उहाँले प्रदेश सरकार जनताको हितमा काम गर्न प्रतिबद्ध रहेको बताउनुभयो ।

मन्त्री तामाङले नेपाली समाजका मौलिक चाडपर्वले आपसी सद्भाव, भाइचारा र सामाजिक एकतालाई बलियो बनाउने उल्लेख गर्दै बडादसैँजस्ता पर्व परिवार तथा आफन्तसँग मिलेर हर्षोल्लासपूर्वक मनाउन आग्रह गर्नुभयो। चाडपर्वले परिवार, समुदाय र समाजका सदस्यबीच आत्मीयता बढाउनुका साथै एकअर्काप्रति सम्मान र सहयोगको भावना विकास गर्ने उहाँको भनाइ थियो ।

नेपाली समाजको मौलिक सभ्यता, संस्कृति र परम्परामाथि विभिन्न कोणबाट चुनौती थपिँदै गएको उल्लेख गर्दै मन्त्री तामाङले मौलिक पहिचानको संरक्षणमा सबैले ध्यान दिनुपर्ने बताउनुभया। उहाँले भन्नुभयो “समाजमा विद्यमान असल संस्कार, परम्परा र मानवीय मूल्यलाई जोगाउँदै भावी पुस्तामा हस्तान्तरण गर्नु सबैको साझा दायित्व हो ।”

संस्कारयुक्त समाज निर्माणका लागि परिवारदेखि समुदायसम्म सकारात्मक सोच र व्यवहारको विकास गर्न आवश्यक रहेको उहाँले बताउनुभयो । मन्त्री तामाङले भन्नुभयो “सभ्य, अनुशासित र एकताबद्ध समाज निर्माण गर्न सबै पक्ष एकजुट हुनुपर्छ । सामाजिक सद्भाव कायम राख्न र मौलिक संस्कृति संरक्षण गर्न म सबैलाई आह्वान गर्दछु ।”

कार्यक्रममा थारु महिला अगुवा समाजले बडादसैँको अवसर पारेर शुभकामना आदानप्रदान तथा भेटघाट कार्यक्रम आयोजना गरेको थियो । कार्यक्रममा सहभागीहरूले एकअर्कामा दसैँको शुभकामना आदानप्रदान गर्दै चाडपर्वलाई आपसी सद्भाव, सहकार्य र भाइचाराको माध्यमका रूपमा विकास गर्नुपर्नेमा जोड दिनु भएको थियो ।