चितवन ३ मा राप्रपाका पाण्डे र ३ (ख) मा माओवादीका ढकाल विजयी

चितवन, १० मंसिर । चितवन क्षेत्र नं ३ बाट प्रतिनिधि सभा सदस्यमा राष्ट्रिय प्रजातन्त्र पार्टीका उपाध्यक्ष विक्रम पाण्डे निर्वाचित भएका छन् । शुक्रबार राति सार्वजनिक मतपरिणाम अनुसार पाण्डे ९ हजार २३३ मतान्तरले निर्वाचित भएका हुन् । पाण्डेले ३५ हजार ५५ मत प्राप्त गर्दा उनका निकटतम प्रतिद्वन्दी माओवादी केन्द्रका डा भोजराज अधिकारीले २५ हजार ८२२ मत प्राप्त गरे ।

राष्ट्रिय स्वतन्त्र पार्टीकी जीता बरालले १४ हजार ८४२ मत ल्याएर तेस्रो स्थानमा पुगिन् भने नेपाली कांग्रेसबाट कारबाही भोगेका दिनेश कोइराला १२ हजार २७५ मतका साथ चौँथो स्थानमा पुगे । माछा चिह्न लिएर स्वतन्त्र उमेदवारी दिएका कोइराला पश्चिम क्षेत्रमा पुगेपछि निरन्तर पछाडि रहे ।

यसैगरी प्रदेश सभा क्षेत्र नं ३ (ख) बाट नेकपा माओवादी केन्द्रका नेता ठाकुर ढकाल निर्वाचित भएका छन् । ढकालले ८४६ मतले राप्रपाकी रिना गुरुङलाई पराजित गरेका हुन् ।

यस क्षेत्रमा ४४ हजार ६८ मत गणना गर्दा ढकालले १५ हजार ४६१ मत प्राप्त गर्दा निकटतम प्रतिद्वन्दी राप्रपाकी गुरुङले १४ हजार ६१५ मत पाइन् । नेकपा एमालेकी सरस्वती विष्ट १० हजार १२४ मतका साथ तेस्रो स्थानमा पुगिन् ।