रवि लामिछानेलाई पक्राउ गर्ने प्रहरीको तयारी

काठमाडौँ, ७ असोज । सरकारले राष्ट्रिय स्वतन्त्र पार्टी (रास्वपा) का सभापति रवि लामिछानेलाई सहकारीको रकम अपचलन प्रकरणमा पक्राउ गर्ने तयारी गरेको छ।

विभिन्न सहकारी संस्थाको रकम हिनामिना विषयमा छानबिन गर्न बनेको संसदीय विशेष समितिले बुझाएको प्रतिवेदनका आधारमा सरकारको निर्देशनमा प्रहरीले पूर्वउपप्रधान तथा गृहमन्त्रीसमेत रहेका लामिछानेलाई अनुसन्धानका लागि कास्की प्रहरीको आग्रहमा पक्राउ तयारी गरेको हो।

प्रहरीले नियन्त्रणमा लिने तयारी गरेको सूचना दिएपछि लामिछानेले पार्टीका नेतासँग छलफल गरेका छन्। प्रहरीले आइतबार साँझ रास्वपा केन्द्रीय कार्यालय वनस्थलीमा रहेका लामिछानेलाई पक्राउ गर्ने सूचना दिएको थियो। सूचना पाएपछि उनले पार्टीका नेताहरूसँग आवश्यक निर्णय लिन र परिआएमा प्रतिवाद गर्न छलफल गरेका हुन्। प्रहरीले लामिछानेको निवास र रास्वपा पार्टी कार्यालय दुवै ठाउँमा निगरानी बढाएको छ।

‘कास्की प्रहरीमा सहकारीपीडितले रवि लामिछानेविरुद्ध जाहेरी दिनुभएको छ। त्यसकै आधारमा उहाँलाई पक्राउ तयारी गरिएको हो’, प्रहरी प्रधान कार्यालय स्रोतले भन्यो। लामिछानेमाथि सहकारीको रकम ठगी गरेको, कागजात किर्ते गरेको, संगठित अपराध, सम्पत्ति शुद्धीकरण तथा कम्पनी रजिष्ट्रारको कार्यालयलाई छल गरेको आरोपमा अनुसन्धान हुने प्रहरीले जनाएको छ। स्रोतः नागरिक दैनिक