चितवन क्षेत्र नं. २ मा ६२.७७ प्रतिशत मत खस्यो, गत निर्वाचनभन्दा ५ हजार ७४० मत कम

चितवन, १० वैशाख । चितवन क्षेत्र नम्बर २ मा सम्पन्न उपनिर्वाचमा ६२ दशमलब ७७ प्रतिशत मत खसेको छ । दुई वटा मतदान केन्द्रमा केहीबेर रोकिएपनि समग्रमा जिल्लाको मतदान शान्तिपूर्ण रुपमा सम्पन्न भएको हो ।

मतदानका क्रममा भरतपुर महानगरपालिका वडा नम्बर ११ नयाँ किरण माबिमा बिबाद भएपछि केही समय मतदान रोकिएको थियो । राष्ट्रिय स्वतन्त्र पार्टीका समर्थकहरुले नाराबाजी गरेपछि उत्पन्न विवादपछि रोकिएको मतदान रास्वपाले गल्ती स्वीकार गर्दै सर्वदलीय सहमतिमा पुनः शुरु गरिएको थियो । कृष्णपुर मावि मतदान केन्द्रमा पनि केही समय रोकिएको मतदान पुनः शुरु भएको थियो ।

यस क्षेत्रमा ४३ स्थलका १३८ केन्द्रमा मतदान गरिएको हो । जसमा ७८ हजार २७७ मतदाताले मतदान गरेको मुख्य निर्वाचन अधिकृतको कार्यालय चितवनले जानकारी दिएको छ । यस क्षेत्रमा १ लाख २४ हजार ६९७ जना मतदाता रहेका छन् । जस मध्ये ६३ हजार २९१ महिला, ६१ हजार ४०३ पुरुष र एक जना तेस्रो लिङ्गी रहेका छन् ।

मुख्य निर्वाचन अधिकृतको कार्यालयका चितवनका सहायक निर्वाचन अधिकृत इश्वरी आचार्यका अनुसार उद्योग संघ चितवनको अन्तर्राष्ट्रिय प्रदर्शनी स्थलमा मतगणना हुनेछ । मतपेटिका ल्याउने क्रम शुरु भएको उहाँले जानकारी दिनुभयो । राती १० बजेसम्म मतपेटीका आईपुग्ने अनुमान गरिएको उहाँले बताउनुभयो । मतपेटीका आएपछि राजनैतिक दलको सहमतीमा मतगणना सुरु गरिने उहाँको भनाई छ । चार स्थानमा गणना गर्न मिल्ने गरी व्यवस्थापन गरिएको छ । तीन दिनभित्र परिणाम आउन सक्ने उहाँले बताउनुभयो ।

यस क्षेत्रमा लोकतान्त्रीक बाम गठवन्धनबाट नेपाली काङ्ग्रेसका जीतनारायण श्रेष्ठ, नेकपा (एमाले) बाट रामप्रसाद न्यौपाने र राष्ट्रिय स्वतन्त्र पार्टीबाट रवि लामिछाने लगायत २२ जना उम्मेदवार चुनाबी मैदानमा हुनुहुन्छ । गत मंसिर ४ गते सम्पन्न निर्वाचनबाट निर्वाचित लामिछानेको नागरिकता विवादमा सर्वाेच्च अदालतले सांसद पद खारेजी गरेपछि उपनिर्वाचन भएको हो ।

गत मसिंर ४ गते सम्पन्न निर्वाचनमा ६७ दशमलब ६३ प्रतिशत अर्थात ८४ हजार १७ मत खसेको थियो । सो समयमा १ लाख २४ हजार २१७ मतदाता रहेका थिए ।