उपनिर्वाचनः चितवन, तनहुँ र बारामा शान्तिपूर्ण मतदान सुरु

चितवन, १० वैशाख । उपनिर्वाचन हुने चितवन २, बारा २ र तनहुँ १ मा शान्तिपूर्ण रुपमा मतदान सुरु भएको छ । चितवन २ मा मतदान गर्नका लागि मतदाताहरु बिहानैदेखि मतदान स्थलमा पुगेर लाइन लागेका थिए ।

निर्वाचन आयोगका अनुसार बिहान ७ बजेदेखि साँझ ५ बजेसम्म मतदानको कार्यतालिका रहेको छ । निर्वाचन हुने तीन वटै क्षेत्रमा आज सार्वजनिक बिदा दिइएको छ ।

चितवन २ मा ४३ वटा मतदान स्थल र १३८ वटा मतदान केन्द्र रहेका छन् । यस क्षेत्रमा भरतपुर महानगरका १० वटा वडा, कालिका नगरपालिका र इच्छाकामना गाउँपालिकाका गरी एक लाख २४ हजार ६९५ मतदाता रहेका छन् ।