सार्वजनिक स्थानमा सुर्तीजन्य पदार्थ प्रयोग गरे काठमाडौँ महानगरले कारबाही गर्ने

काठमाडौं,भदौ ३०। काठमाडौँ महानगरपालिकाले आागमी असोज १ गतेदेखि सार्वजनिक स्थानमा धूमपान तथा सुर्तीजन्य पदार्थ प्रयोगलाई पूर्ण रुपमा निषेध गर्ने भएको छ । 
महानगरपालिकाले आज सूचना जारी गर्दै निषेधित क्षेत्रमा धूमपान तथा सुर्तीजन्य पदार्थको प्रयोग गरेको पाईए कानून अनुसार कारबाही गरिने चेतावनी दिएको छ ।

महानगरको ११ औँ अधिवेशनले सार्वजनिकस्थलमा धूमपान गर्न निषेध गर्ने व्यवस्था प्रभावकारी रुपमा कार्यान्वयन गर्ने नीति पारित गरेको थियो । अहिले सो नीतिलाई कार्यान्वयन गर्न लागिएको महानगरपालिकाले जनाएको छ ।

‘प्रचलित कानून, सदाचार र सार्वजनिक हित तथा भलाईका दृष्टिले सार्वजनिक स्थललाई धूमपान तथा सुर्तीजन्य पदार्थ सेवन नगर्ने स्थल बनाउन काठमाडौँ महानगरपालिकाद्धारा यो सूचना जारी गरिएको छ । उल्लंघन गरेमा सुर्तीजन्य पदार्थ नियन्त्रण र नियमन गर्ने ऐन २०६८, समेतका आधारमा कानून उल्लंघन गर्ने व्यक्तिलाई सार्वजनिक स्थलबाट बाहिर निकाल्ने वा तोकिए बमोजिमको जरिवाना समेत हुने व्यहोरा सूचित गरिन्छ ।’ सूचनामा भनिएको छ । 

नेपालमा प्रत्येक वर्ष २७ हजार १३७ जनाले सुर्तीजन्य पदार्थको प्रयोगबाट मृत्यु हुने गर्दछ । । सरकारले सुर्तीजन्य पदार्थको सेवनलाई निरुत्साहित गर्न सुर्तीजन्य पदार्थ नियन्त्रण तथा नियमन ऐन २०६८, निर्देशिका बनाएको छ । तर प्रभावकारी कार्यान्वयन हुन सकेको छैन् ।