नेकपा (एकीकृत समाजवादी) का जिल्ला कमिटी सदस्य कमलबहादुर घिमिरे एमालेमा फर्किए

चितवन, १६ भदौ । नेकपा (एकीकृत समाजवादी) का जिल्ला कमिटी सदस्य कमलबहादुर घिमिरे एमालेमा फर्किएका छन् । पूर्वी चितवनको रत्ननगर नगरपालिका वडा नं. १० निवासी घिमिरे समाजवादीको वडा कमिटी इन्चार्ज समेत रहेका थिए ।

आम निर्वाचन नजिकिंदै गर्दा घिमिरे एमालेमै फर्किका हुन । एमाले जिल्ला पार्टी कार्यालयमा आयोजित कार्यक्रममा पार्टी उपाध्यक्ष तथा पूर्व अर्थमन्त्री सुरेन्द्र पाण्डेले उनलाई पार्टीमा पुनः स्वागत गरेका थिए । कार्यक्रममा एमालेका केन्द्रीय सदस्य जेएन थपलिया, नेता विजय सुवेदी, जिल्ला सचिव प्रकास खनाल, जिल्ला सदस्य राजाराम रेग्मीको उपस्थिति रहेको थियो ।

घिमिरेले विहीवार नै एमालेमा पार्टी सदस्यता नविकरण गरेका छन् । “समाजवादीमा विचलन देखियो” उनले भने “त्यहाँ बस्न मन नलागेर पुरानै घर फर्किएँ ।” घिमिरेको वडाबाट स्थानीय तहको निर्वाचन अघि समाजवादीबाट चन्द्रकान्त ओझा लगायत जिम्मेवार पदमा भएका नेताहरु एमालेमा फर्किएका थिए ।

घिमिरेले वडामा रहेका अन्य समाजवादीका नेता तथा कार्यकर्ताहरु पनि एमालेमा फर्किने विश्वास व्यक्त गरे । आम निर्वाचन नजिकिएसँगै समाजवादीबाट नेता तथा कार्यकर्ताहरु एमालेमा फर्किन थालेका छन् ।