जनमतको अपमान र असुरक्षा हुने घटनाप्रति नेकपा एमाले चितवन सचेत छ : अध्यक्ष न्यौपाने

चितवन, २५ वैशाख । नेकपा (एमाले) चितवनले आसन्न निर्वाचनमा हुन सक्ने धाँधली र मतपत्र च्यातिनसक्ने घटना रोक्न योजना बनाएको छ । गत निर्वाचनमा भरतपुरमा मतपत्र च्यातिएपछि यस पटक एमालेले पूर्व तयारी गरेको हो ।

एमाले चितवनका अध्यक्ष रामप्रसाद न्यौपानेका अनुसार यसपटकको निर्वाचनमा धाँधली रोक्न सम्पूर्ण तयारी गरिएको छ । उहाँले भन्नुभयो “राज्यशक्ति नै लागेर धाँधली गर्न खोजेमा पनि त्यसलाई रोक्ने गरी हामीले पनि तयारी गरेका छौं ।”

लोकतन्त्रमा भयरहित वातावरणमा मतदान र धाँधलीरहित तरिकाले परिणाम ल्याउने वातावरण सिर्जना हुनु पर्ने बताउँदै न्यौपानेले भन्नुभयो “जनताको मत नै अन्तिम निर्णायक हुन्छ । हामी जनताले दिने मतको सम्मान गर्न चाहन्छौं । जनताले व्यक्त गरेको मतको अपमान र असुरक्षा हुने घटनाप्रति नेकपा (एमाले) चितवन सचेत छ ।”

भरतपुरमा विगतमा भएका घटनाहरुलाई मध्यनजर गर्दै नेकपा यस पटक जनमतको सुरक्षाको सवाललाई महत्वपूर्ण रुपमा उठान गर्दै आएको उहाँले बताउनुभयो । न्यौपानेले भन्नुभयो “हामीले निर्वाचन आयोग, प्रहरी प्रशासनलाई जनताले भयरहित वातावरणमा मतदान गर्न पाउनुपर्ने र जनताको मतलाई सुरक्षित तवरले गणना गरी परिणाम बाहिर ल्याउन निरन्तर दबाब दिइरहेका छौं ।”

जसरी पनि भरतपुर जित्ने भनेर राज्यसत्ता अनेक खालका हत्कण्डामा लागेको भन्दै उहाँले एमालेले जनमतको बलमा त्यो हत्कण्डालाई रोक्ने बताउनुभयो । उहाँले अगाडि भन्नुभयो “उम्मेदवारको मनोनयनदेखि नै भरतपुरमा थालिएको सत्ताको दुरुपयोग चुनावसम्म पुग्दा अझै बढ्ने नै छ । अघिल्लोपटक मतपत्र च्यात्न सहयोगी भएको निर्वाचन आयोग र तत्कालिन प्रशासन यसपटक धाँधलीका अनेक काण्डको हिस्सेदार नबनोस् भन्ने सचेत गराउन चाहन्छौं ।”

शान्तिपूर्ण र भयरहित वातावरणमा मतदान गरी सुरक्षित तरिकाले मतगणना गर्नेसम्मका काममा एमाले सयोग गरेर जिम्मेवार पार्टीको रुपमा आफ्नो भूमिका निर्वाह गर्न चाहेको न्यौपानेको भनाई छ । बि.सं. २०७४ सालको स्थानीय निर्वाचनमा भरतपुरमा माओवादीका कार्यकर्ताले मतपत्र च्यातेका थिए । उक्त घटनापछि भरतपुर १९ मा पुनः मतदान भएको थियो । यस पटक पनि यस्तै घटना दोहोरिन सक्ने भन्दै भरतपुरवासीले चिन्ता व्यक्त गर्दै आएका छन् ।