सरकारले कोभिड अति प्रभावितलाई १० हजार रुपैँयाका दरले उपलब्ध गराउने

काठमाडौँ, २५ कात्तिक । सरकारले कोभिड अति प्रभावित परिवारलाई प्रतिपरिवार १० हजार रुपैँयाका दरले उपलब्ध गराउने भएको छ। करीव ५ लाख विपन्न परिवारलाई प्रतिपरिवार १० हजार रुपैयाँका दरले नगद उपलव्ध गराउने प्रक्रिया अघि बढाएको भन्दै अर्थ मन्त्रालयले सूचना जारी गरेको छ। मन्त्रालयले विहीबार सूचना जारी गर्दै नगद अनुदान लिन चाहने परिवारले १५ दिन भित्र निवेदन दिन आग्रह गरेको छ ।

कस्ता परिवारले पाउँछन् १० हजार अनुदान ?

खुल्ला सडक , फुटपाथ वा चौरमा खर्पन नागलो, डोको आदिनमा सामान बेच्ने अति विपन्न व्यवसायी ।
विगतमा गर्दै आएको रोजगारी पूर्णरुपमा गुमाएको र रोजगारीको अर्को अवसर समेत प्राप्त गर्न नसकी बेरोजगार भएको असंगठित क्षेत्रको मजदुर वा कामदार।

दैनिक ज्याला मजदुरी गर्ने भरिया, कृषि मजदुर, गोठाला, खेताला, ज्यालादारी श्रमिक रिक्साचालक, ठेलागाडा मजदुर, सार्वजनिक यातायातका मजदुर, पर्यटक भरिया ।

कोभिड १९ संक्रमणका कारणबाट एकाघर परिवारको आय आर्जन गर्ने मुख्य सदस्यको मृत्यु भई आर्थिक अड्चन झेल्नु परेका परिवार तथा अभिभावक गुमाएका असहाय नावालकलाइ स्याहार गर्ने परिवार ।