सडकमा यातायात व्यवसायीको दादागिरी, भाडा बढाउन माग गर्दै सडकमै गाडी तेर्स्याए

काठमाण्डौ, १८ असोज । यातायात व्यवसायीले सडकमा दादागिरी देखाएका छन्। व्यवसायी आफैँले भाडा बढाउँदा ट्राफिक प्रहरीले कारबाही गर्न थालेपछि सडकमा गाडी तेस्र्याएर विरोध गरेका हुन्।

महानगरीय ट्राफिक महाशाखाका अनुसार रिङरोडभरि ५ सय वटा बस तेर्स्याइएका छन्।भाडा बढाउनुपर्ने माग राखेर यातायात व्यवसायीले सडकमा बस तेर्स्याई चाबी लिएर हिँडेका छन्।कार्यालय समयमा व्यवसायीले सडकमा बस तेर्स्याएपछि यात्रुलाई सास्ती भएको छ भने काठमाडौं उपत्यकाको सवारी अस्तव्यस्त बनेको छ।व्यवसायीले पुरानो भाडादरमा २८ प्रतिशत बढाउने निर्णय गरेका छन्। जसअनुसार न्यूनतम भाडा नै १५ बाट २० रुपैयाँ पुर्याएका छन्।

यातायात व्यवसायीका दुईवटा महासंघ रहेका छन्। सार्वजनिक यातायात केन्द्रीय महासंघले आफैँ भाडा घोषणा गरेको छ भने यातायात व्यवसायी राष्ट्रिय महासंघले भाडा बढेको विषयमा जानकारी नभएको बताएका छन्।

केन्द्रीय महासंघले भाडा बढाएपछि ट्राफिक प्रहरीले दैनिक कारबाही गरेको छ। प्रहरीले गाडी सञ्चालन गर्न खोजे पनि व्यवसायीले चल्न दिएका छैनन्।

‘कोटेश्वर, चाबहिल, सुकेधारा,गौशाला क्षेत्रमा जाम छ । नेपाल यातायात व्यवसायी राष्ट्रिय महासङ्घका महासचिव सरोज सिटौलाले पटक पटक भाडा समायोजन गर्न आग्रह गर्दा पनि वाग्मती प्रदेश सरकारले वास्ता नगरेपछि व्यवसायीहरुले विरोध प्रदर्शन गरेका बताउनुभयो ।

यसअघि गएको साउन ७ गते पनि उनीहरुले चक्रपथमा नै गाडी तेर्स्याएर विरोध प्रदर्शनसहित र्याली निकालेका थिए । त्यतिबेला उनीहरुले कोभिडविरुद्धको खोप, भाडा समायोजन, ४० वर्ष पुगेका गाडीको अवधि थप, यातायातको बीमा छुट, नवीकरण र जरिबाना छुट लगायतका माग राखेका थिए ।