१२ जिल्लाका सीडीओ फेरिए, चितवनको प्रमुख जिल्ला अधिकारीमा आस्मान तामाङ

चितवन, ३० भदौ । गृह मन्त्रालयले १२ जिल्लाका प्रमुख जिल्ला अधिकारी काज सरुवामार्फत परिवर्तन गरेको छ । बुधबार गृहमन्त्री बालकृष्ण खाँणले मन्त्रीस्तरीय निर्णयबाट प्रमुख जिल्ला अधिकारीहरुको सरुवा गर्नुभएको हो । रुपन्देहीका प्रमुख जिल्ला अधिकारी आस्मान तामाङलाई चितवनको प्रमुख जिल्ला अधिकारीमा सरुवा गरिएको छ । रुपन्देहीमा गृह मन्त्रालयका सहसचिव ऋषिराम तिवारी पठाइएको छ ।

ललितपुरका सीडीओ ढुण्डीराज निरौला गृह मन्त्रालयमा सरुवा हुनु भएको छ भने उहाँको ठाउँमा सहसचिव घनश्याम उपाध्याय पठाइएको छ । गुल्मीकी सीडीओ रुद्रादेवी शर्मा भक्तपुरमा सरुवा हुनु भएको छ भने गुल्मीमा सहसचिव पुण्यबिक्रम पौडेल पुग्नु भएको छ ।

मोरङका सीडीओ कोषहरि निरौला मन्त्रालयमा सरुवा हुनु भएको छ भने उहाँको ठाउँमा सहसचिव काशीराज दाहाल सीडीओ बन्नु भएको छ । गोरखामा शंकरहरि आचार्य, रामेछापमा दीपककुमार पहाडी र संखुवासभामा नुरहरि खतिवडा सीडीओ बन्नु भएको छ । संखुवासभाका सीडीओ टेकनारायण पौडेल गृह मन्त्रालयमा सरुवा हुनु भएको छ ।

दोलखामा टेकराज निरौला सीडीओ बनेका छन् भने त्यहाँबाट बासुदेव घिमिरे मन्त्रालयमा सरुवा भएका छन् । त्यस्तै धादिङमा कृष्णप्रसाद लम्साल र उदयपुरमा वीरेन्द्रप्रसाद यादव सीडीओ बनेका छन् ।