चितवनमा २४७ जनामा डेंगु र ३१८ जनामा स्क्रब टाइफसको संक्रमण, टाइफसको संक्रमण दोब्बर बढ्यो

चितवन,२ भदौं । जिल्लाका बिभिन्न अस्पतालमा उपचारका लागि आएका बिरामी मध्ये २ सय ४७ जनामा डेंगु सङ्क्रमण देखिएको छ । १ हजार ९ सय ८६ जनाको परिक्षण गरिएकोमा २ सय ४७ जनामा डेंगु देखिएको हो ।

स्वास्थ्य कार्यालय चितवनका अनुसार गत आर्थिक वर्षमा गरिएको परिक्षणमा सो संख्यामा डेंगुको सङ्क्रमण देखिएको हो ।जस मध्ये चितवनका ५५ जना महिला र ९५ जना पुरुष गरि १ सय ५० जना रहेका छन् । अन्य वाहिरी जिल्लाका रहेका छन् ।

जिल्लामा सबैभन्दा वढि सङ्क्रमण भरतपुर महानगरपालिकामा देखिएको छ । महानगरमा ७४ जनामा डेंगु देखा परेको छ । यस्तै खैरहनी नगरपालिकामा २० जना, माडी नगरपालिकामा ९ जना, रत्ननगर नगरपालिकामा ३० जना, राप्ती नगरपालिकामा ८ जना, कालिका नगरपालिकामा ७ जनामा डेंगु देखा परेको छ । इच्छाकामना गाउँपालिकामा भने २ जनामा डेंगुको संङ्क्रमण देखिएको स्वास्थ्य कार्यालय चितवनका किट नियन्त्रक राम केसीले जानकारी दिनुभयो ।

यो रोग बढि मात्रामा शहरी क्षेत्रमा देखिएको उहाँले जानकारी दिनुभयो । एडिस एजप्टाई÷एलबोपिक्टर्स जातको लामखुट्टेको टोकाइबाट यो रोग सर्छ । शहरी क्षेत्रमा वढि मात्रामा पानी जम्ने ठाउँहरु हुने भएकाले वढि देखिएको उहाँले बताउनुभयो ।

तीन सय १८ जनामा स्क्रफ टाईफस

केसीका अनुसार जिल्लाका अस्पतालमा आएका बिरामी मध्ये ३ सय १८ जनामा स्क्रफ टाईफसको सङ्क्रमण देखिएको छ । गत आर्थिक वर्षमा २ हजार २ सय ९० जनाको परिक्षणका क्रममा सो संख्यामा स्क्रफ टाईफस देखिएको हो ।

उनीहरु मध्ये १ सय ७० जना जिल्लाका रहेका छन् । महिला ९० र पुरुष ८० जनामा स्क्रफ टाईफस देखिएको उहाँले बताउनुभयो । यो रोग मुसामा लाग्ने किर्ना जस्तो देखिने किरा माइटको टोकाइबाट मानिसमा सर्दछ । स्क्रफ टाइफसका कारण भरतपुर अस्पतालमा उपचारका क्रममा एक जनाको मृत्यु भएको थियो ।

 यसरी हेर्दा डेंगुको संक्रमण गत वर्षभन्दा कम देखिए पनि चितवनमा स्क्रब टाइफसको संक्रमण भने गत वर्षको भन्दा दोब्बर बढी भएको देखिन्छ ।