भरतपुर अस्पतालले भन्यो: भीडभाडले जोखिम बढ्यो, अति आवश्यक परे मात्र अस्पताल आउनु

चितवन,३१ साउन ।भरतपुर अस्पतालले अस्पतालमा हुने भीडभाडले कोरोनाको जोखिम बढेको भन्दै आवश्यकता परेमात्र अस्पताल आउन सर्वसाधारणमा अनुरोध गरेको छ ।

अस्पतालले आज सर्वसाधारणमा अपिल गर्दै डेल्टा भेरियन्टको संक्रमण चितवन र आसपासका क्षेत्रमा तीव्र गतिमा फैलिएको भन्दै सो अनुरोध गरेको हो ।

अपिलमा चितवन जिल्लामा संक्रमण बढ्न नदिन रोकथाम, नियन्त्रण र उपचार व्यवस्थालाई थप प्रभावकारी बनाउन सो कदम चाल्नुपरेको जनाइएको छ । अति आवश्यक पर्दा मात्र अस्पताल आउन र स्वास्थ्य सुरक्षाका मापदण्ड प्रभावकारी ढंगले पालन गर्न अस्पतालले अनुरोध गरेको छ । त्यसैगरी अस्पतालमा पछिल्लो समयमा शैया भन्दा बढी संख्यामा कोरोनाका बिरामीको उपचार भइरहेको जानकारी दिँदै अस्पतालमा अक्सिजन आवश्यक पर्ने बिरामीको संख्या अत्यधिक रहेको जनाएको छ । अस्पतालले भनेको छ, ‘ कोभिड संक्रमित बिरामीहरुको मृत्युदर बढ्दै गएको अवस्थामा कोभिड संक्रमित बिरामीहरुको संख्या बढ्दै गएमा उपचारमा थप कठिनाइ हुने सम्भावना छ ।’