गगन थापा भन्छन् :वर्तमान सरकारलाई गल्ती गर्ने कुनै छुट छैन

काठमाडौँ, १५ साउन । सत्तारुढ दल नेपाली कांग्रेसका नेता गगन थापाले पार्टी नेतृत्वको वर्तमान सरकारलाई गल्ती गर्ने कुनै पनि छुट नभएको बताएका छन्। उनले पार्टी सभापति शेरबहादुर देउवा नेतृत्वको वर्तमान सरकारले कुनै पनि ‘एक्सक्युज’ नपाउने उल्लेख गर्दै कहींकतै नचुक्न पनि ध्यानाकर्षण गरेका छन्।

बीपी कोइराला प्रतिष्ठान, खाँडदेवी गाउँपालिकाले शुक्रबार काठमाडौंमा आयोजना गरेको कार्यक्रममा नेता थापाले केपी ओलीले यो गरेन त्यो गरेन भन्ने दिन गएको स्मरण गराउँदै कांग्रेस नेतृत्वको सरकारले अभावमा रहेका नागरिकलाई सरकार कस्तो हुन्छ भन्ने कुराको महसुस गराउने गरी काम गर्नुपर्ने बताए।

‘केपी ओलीले यो गरेन, त्यो गरेन् भनेर भन्ने दिन अब गए। अब अभावमा रहेका नागरिकलाई सरकार भनेको कस्तो हुन्छ भन्ने कुराको महसुस गराउने हो‚’ थापाले भने‚ ‘कुनै पनि एक्सक्युज यो सरकारले पाउने छैन। एक ठाउँमा पनि सरकार चुक्न पाउने छैन।’

नेता थापाले सरकारलाई सफल बनाउन सिंगो पार्टीले सहयोग गर्नुपर्ने आवश्यकता पनि औंल्याए। फरक प्रसंगमा उनले पार्टीको आसन्न १४औं महाधिवेशनको मिति तलमाथि नगर्न पार्टी नेतृत्वको ध्यानाकर्षण गरे।

‘पाटीको महाधिवेशनको तिथि मिति धेरै तलमाथि गर्न पाइँदैन। हाम्रो संविधानले पाँच वर्षपछि पार्टीको महाधिवेशनको मिति ६ महिना थप गर्न मिल्ने व्यवस्था गरेको छ‚’ उनले भने, ‘संविधानको सो व्यवस्थाअनुसार अब महाधिवेशनको मिति पछि सार्न मिल्दैन।’

नेता थापाले पार्टीको क्रियाशील सदस्यता सम्बन्धि विवाद समाधान गर्ने थलो पार्टीको पदाधिकारी र पूर्वपदाधिकारी बैठक नभएको पनि दावी गरे। पार्टीको विधानले केन्द्रीय कार्यसमितिबाट विवाद समाधान गर्नुपर्ने व्यवस्था भए पनि पार्टी नेतृत्व विधानअनुसार चल्न नसकेको आरोप लगाउँदै आपत्ति जनाए।