नारायणगढ–मुग्लिन सडकअबरुद्धको कारण आन्तरिक हवाइ उडानमा बढ्यो चाप

भरतपुर, २५ असार । नारायणगढ–मुग्लिन सडक खण्डमा निरन्तर पहिरो गएपछि आन्तरिक हवाइ उडानमा चाप बढेको छ । भरतपुरबाट काठमाडौँका लागि हुने सबै उडानहरुमा यात्रुको चाप रहेको भरतपुर विमानस्थलले जनाएको छ ।

सरकारले असार २३ गतेदेखि आन्तरिक उडानलाई थप खुकुलो बनाएको छ । असार २३ देखि दैनिक बुद्ध एयरको ६ र तारा एयरको २ उडान हुँदै आएको छ । त्यसअघि असार १८ देखि दैनिक तीन वटा मात्रै उडान भएका थिए ।

नारायणगढ–मुग्लिन सडक र पृथ्वी राजमार्गका विभिन्न स्थानमा पहिरो गएकाले हवाई यात्रा गर्ने यात्रुको चाप उल्लेख्य रहेको भरतपुर विमानस्थलका सूचना अधिकारी पुस्कलराज शर्माले बताउनुभयो । यात्रुको चापले दुवै एयरका सिट भरिएको शर्माले जानकारी दिनुभयो ।

बुद्धको एउटा एयरमा ४५ जना र ताराको एउटा एयरमा १६ जना यात्रु अट्ने ,दैनिक ३०० भन्दा बढी यात्रु हवाई यात्राबाट काठमाडौँ जाने गरेको शर्माले बताउनुभयो। त्यसकै हाराहारीमा यात्रु काठमाडौँबाट भरतपुर आउने गरेका छन् ।