पूर्वी चितवनको राप्तीमा कर्फ्यु जारी, अहिलेसम्मको अवस्था सामान्य

चितवन, २३ असार ।राप्ती नगरपालिका–३ प्रगतिनगरकी २३ वर्षीय सुजिता भण्डारीको मृत्युपछि जारी प्रदर्शनलाइ रोक्न जिल्ला प्रशासन कार्यालय चितवनले हिजो रातिदेखि राप्तीमा कर्फ्यु लगाएको छ ।

प्रशासनले हिजो मंगलबार साँझ ७ः३० देखि आज बुधबार ७ः३० सम्म कफ्र्यू जारी गरेको हो । मंगलबार दिनभर राजमार्ग क्षेत्रमा प्रदर्शन र झडप भएपछि प्रशासनले निषेधाज्ञा जारी गरेको जनाएको छ ।

निषेधाज्ञा आज बिहानैदेखि कडाइका साथ लागु गरिएको छ । विभिन्न क्षेत्रमा जनपथ र सशत्र प्रहरी परिचालन गरिएको छ । राजमार्गमा अन्य जिल्लामा जाने सवारी साधनलाई आवतजावत गर्न दिइएको छ भने स्थानीय स्तरमा हिँड्डुल, जमघट गर्न रोक लगाइएको छ । राप्ती नगरपालिकाको वडा नम्बर १ लोथर पुलदेखि वडा नम्बर ४ डढुवा चोकसम्मको राजमार्गक्षेत्र सामान्य छ । घर बाहिर राजमार्ग क्षेत्रमा कोही निस्केका छैनन् भने स्थानीय स्तरमा सवारी साधन चलेका छैनन् ।

प्रशासनले निषेधाज्ञा उल्लघंन गरे गिरफ्तार गरी एक महिनासम्म कैद वा जरिवाना वा दुबै सजाय हुन सक्ने जनाएको छ ।

सुजिता असार ११ गतेदेखि हराइरहेकी थिइन् । असार ११ गते बिहान ६ बजे साथीको घर जाने भनेर हिँडेकी सुजिता सोही दिनदेखि वेपत्ता भएकी थिइन् ।

१० दिनपछि स्थानीय ब्रह्मस्थाानी सामुदायिक वनमा सुजिताको शव फेला परेको थियो ।