इङ्ल्याण्डले जित्यो विश्वकप क्रिकेटको उपाधी, सुपरओभरबाट छिनोफानो

काठमाडौँ । आईसीसी एक दिवसीय विश्वकप क्रिकेट २०१९को उपाधी घरेलु टोली इङ्ल्याण्डले जितेको छ । आइतबार राति भएको फाइनलमा न्यूजिल्याण्ड र इङ्ल्याण्डले समान अङ्क जोडेपछि सुपरओभरमा गएको खेलमा इङ्ल्याण्डलाई विजयी घोषणा गरिएको हो ।

सुपरओभरमा पनि बराबर १५/१५ रन बनाएपछि धेरै बाउण्ड्री हानेको आधारमा इङ्ल्याण्डलाई विजयी घोषणा गरियो । तर यो आधारको विश्वका कतिपय उत्कृष्ट खेलाडीहरुले नै आलोचना गरेका छन् ।

टस जितेर पहिले व्याटिङ रोजेको न्यूजिल्याण्डले आठ विकेटको क्षतिमा २ सय ४१ बनाएको थियो । इङ्ल्याण्डले पनि पूरै ओभर खेल्दै १० विकेटको क्षतिमा समान २ सय ४१ रन नै बनाएको थियो । खेल बराबरी भएपछि सुपर ओभरमा गएको थियो । नेपाली समयअनुसार आइतबार मध्यरातमा सकिएको फाइनल खेलमा इङ्ल्याण्डलाई विजयी घोषणा गरिएको थियो ।

एक दिवसीय विश्वकप क्रिकेटको १२औँ श्रृङ्खलामा पहिलो पटक फाइनलको छिनोफानो सुपरओभरमा भएको हो । इङ्ल्याण्डले एक दिवसीय विश्वकप क्रिकेटको उपाधी जितेर इतिहास समेत रचेको छ । उसले पहिलोपटक यो उपाधी चुमेको हो । 

त्यसअघि इङ्ल्याण्डलाई २४२ रनको लक्ष्य दिने क्रममा न्यूजिल्याण्डका लागि निकोलसले ५५ रन जोडे भने लाथमले ४७ र कप्तान केन विलिम्यसनले ३० रन बनाए । इङ्ल्याण्डका लागि स्टोकले ८४, बटलरले ५९ तथा बैरस्टले ३६ रन बनाएका थिए ।