अफगानिस्तानमा पाँच सुरक्षाकर्मी र ४० लडाकू मारिए

काबुल (रासस/सिन्ह्वा) । अफगानिस्तानमा भएका पछिल्ला सुरक्षा कारबाहीमा परी कम्तीमा पाँच सुरक्षाकर्मी र ४० तालिबान लडाकू मारिएका छन् ।

अधिकारीहरूले बुधबार दिएको जानकारी अनुसार गत २४ घण्टाको अवधिमा भएका सुरक्षा कारबाहीमा उनीहरू मारिएका हुन् ।

मारिएका सुरक्षाकर्मीहरूमध्ये तीन जना अफगानी सैनिक र दुई जना प्रहरी अधिकृत रहेका छन् । उनीहरू अफगानिस्तानको दक्षिणी जाबुल प्रान्तमा पर्ने शुमुल्जायमा मारिएको अधिकारीहरूको भनाइ छ ।

तालिबान लडाकूहरूले मङ्गलबार बेलुकी आक्रमण गरेपछि भएको सो घटनामा परी चार जना तालिबान लडाकू पनि मारिएका छन् । त्यसैगरी पाकिस्तानसँगको सीमा क्षेत्रमा भएको भिडन्तमा परी कम्तीमा १७ लडाकू घाइते भएका छन् ।

नव बहार जिल्लामा भएको अर्को घटनामा परी चार तालिबान लडाकू मारिएका छन् । सो घटना मङ्गलबार भएको हो ।

त्यसैगरी खेलाहजीमा भएको घटनामा चार लडाकू मारिएको र आठ जना घाइते भएको अधिकारीहरूले जनाएका छन् । उनीहरूले देशका अन्य ठाउँमा पनि गत २४ घण्टाको अवधिमा विभिन्न आक्रमण र भिडन्त भएको जानकारी दिएका छन् ।