कोरोना विरुद्धको खोप तयार भएको रुसको दावी, राष्ट्रपति पुटिनकी छोरीमा परीक्षण

चितवन । रुसले कोरोना भाइरस (कोभिड १९) विरुद्धको विश्वकै पहिलो खोप तयार पारेको दाबी गरेको छ । रुसी राष्ट्रपति भ्लादमिर पुटिनले मंगलबार कोरोना विरुद्ध संसारको पहिलो खोपको सफल परीक्षण भएर मान्यता दिइएको बताउनु भएको छ । उक्त खोप आफ्नै छोरीमा पनि प्रयोग गरिएको उहाँले जानकारी दिनुभयो ।

पुटिनले भन्नुभयो “मेरी वयस्क छोरीले नै यसको परीक्षणमा भाग लिएकी छिन् । उनलाई भ्याक्सिनको दुई डोज दिइएको छ ।” पुटिनका अनुसार भ्याक्सिन लगाउँदा उनकी छोरीको शरीरको तापक्रम १००.४ डिग्री फरेनहाइट थियो । त्यसको भोलिपल्ट तापक्रम घटेर ९८.६ डिग्री कायम भयो । दोस्रो भ्याक्सिनपछि छोरीको तापक्रम सामान्य अवस्थामा आएको उहाँले बताउनुभयो ।

“अहिले उनले आराम महसुस गरिरहेकी छन् र एन्टिबडीहरु उच्च संख्यामा छन्” पुटिनले भन्नुभयो । पुटिनका दुई छोरीहरु मारिया र क्याटेरिया छन् । उनीहरुमध्ये कुन छोरीलाई भ्याक्सिन दिएको हो भन्ने पुटिनले खुलाउनु भएको छैन ।

रुसको गामालिया रिसर्च सेन्टरले बनाएको उक्त भ्याक्सिनलाई रुसको स्वास्थ्य मन्त्रालयले मान्यता दिएको हो । पुटिनले खोपको सफल परीक्षण भइसकेको र कोरोना विरुद्ध लड्नका लागि रोग प्रतिरोधात्मक क्षमता पनि विकास गरेको दाबी गर्नुभएको छ। उक्त खोप एडिनोभाइरससँग आधार भएर तयार गरिएको र खोपमा कोभिड–१९का मृत तत्व रहेको र यिनीहरु वृद्धि हुन नसक्‍ने गामालिया रिसर्च सेन्टरका प्रमुख एलेक्जेन्टर गिन्चबर्गले बताउनु भएको छ ।

तर, विज्ञहरुले भने यो भ्याक्सिनबारे प्रश्न पनि उठाएका छन् । उनीहरुले यसको परीक्षणको तीव्रतालाई लिएर प्रश्न गरेका हुन् । यस्तै विश्व स्वास्थ्य संगठन (डब्ल्युएचओ) ले क्लिनिकल टेस्टको तेस्रो चरणमा पुगेका भनेको ६ वटा भ्याक्सिनमा यो नपरेको उल्लेख गरेको छ ।

गत साता नै रुसले यो खोप परीक्षण गरेको भन्दै अब मास भ्याक्सिनेसन सुरु गर्ने बताएको थियो । रुसमा हालसम्म ८ लाख ९१ हजार मानिसहरुमा कोरोना संक्रमण देखिसकेको छ । (बीबीसीको सहयोगमा)