नेपाल ओमानविरुद्ध जवाफी ब्याटिङमा, अहिलेसम्म छ विकेटको क्षतिमा ११६ रन, विनोद पनि आउट

काठमाडौँ । आइसिसी विश्वकप क्रिकेट लिग दुईअन्तर्गत नेपालले अहिले ओमानविरुद्ध जवाफी ब्याटिङ गरिरहेको छ । ओमानले दिएको एक सय ९८ रनको मध्यम लक्ष्य पछ्याएको नेपालले ताजा अवस्थामा ३४ ओभरको खेलमा छ विकेटको क्षतिमा एक सय १६ रन जोडेको छ ।

नेपालका लागि अहिले शरद भेषवाकर र करन केसी क्रिजमा छन् । भेषवाकरले ८० बल खेल्दै ४१ रन बनाएका छन् । भर्खरै विनोद भण्डारी आउट भएपछि केसी क्रिजमा आएका हुन् । २५ बलको सामना गरेका भण्डारीले २६ रन बनाएर आउट भएका हुन् ।

नेपालले चौथो ओभरको पाँचौ बलमा कप्तान ज्ञानेन्द्र मल्ल, पाँचौँ ओभरको तेस्रो बलमा पूर्वकप्तान पारस खड्का, २१औँ ओभरको तेस्रो बलमा दिपेन्द्रसिंह ऐरी, २४औँ ओभरको पहिलो बलमा आरिफ शेख, २३औँ ओभरकै दोस्रो बलमा रोहितकुमार पौडेललाई गुमाइसकेको छ । मल्ल १ रन, खड्का ३ रन, ऐरी ३६ रन, शेख ६ रन बनाउँदा आउट भए । पहिलो बलमै आउट भएका रोहितले कुनै रन जोड्न सकेनन् ।

त्रिवि क्रिकेट मैदान कीर्तिपुरमा टस हारेर ब्याटिङको निम्ता पाएको ओमानले निर्धारित ५० ओभरमा ९ विकेट गुमाएर एक सय ९७ रन बनायो । ओमानले ५७ रन जोड्दा ५ विकेट गुमाइसकेको थियो । तर मोहम्मद नदिम र सन्दीप गौडले पारी सम्हाले । दुबैले छैटौं विकेटका लागि ६० रनको साझेदारी गर्दै ओमानलाई खेलमा फर्काए । गौड ३३ रनमा आउट भए ।

तर नदिम अन्तिमसम्म टिके र अर्धशतकसँगै ओमानलाई मध्यम स्कोरमा पुर्याए । । उनी ६९ बलमा अविजित रहे । ९६ बलको सामना गरेका उनले पाँच चौका र दुई छक्का प्रहार गरे । यस्तै नवौं नम्बरमा आएका नसिम खुसीले १८ बलमा दुई चौका र दुई छक्कासहित २८ रन बनाए ।

नेपालका लागि करण केसीले ४ विकेट लिए भने सुशन भारीले ३ विकेट हात पारे । दीपेन्द्र सिंह ऐरीको नाममा एक विकेट रह्यो । १० ओभर बलिङ गरेका सन्दीप लामिछानेले भने विकेट लिन सकेनन् । उनले ४५ रन खर्चिए ।