बुर्किन नरसंहार : जिहादीद्वारा कम्तीमा ३९ जनाको हत्या

बुर्किन । बुर्किन फासोको उत्तरी क्षेत्रमा भएको नरसंहारका क्रममा कम्तीमा ३९ जना मारिएका छन् । जिहादीहरुले एउटा गाउँमा गरेको आक्रमणमा परी उनीहरु मारिएको सरकारी अधिकारीहरुले बुधबार जानकारी दिएका छन् ।

घटनास्थलबाट अनौपचारिक रुपमा प्राप्त जानकारी अनुसार घटनामा परी ५० भन्दा बढीको मृत्यु भएको छ । “सरकारी सुरक्षाकर्मीहरुले त्यस क्षेत्रमा कारवाही अभियान चलाएका छन्, उनीहरुले नै ३९ जनाको मृत्यु भएको पुष्टि गरेका छन्, विद्रोहीले अत्यन्त दर्दनाक आक्रमण गरेका थिए,” सरकारका प्रवक्ता रेमिस फुल्गान्स डान्डजीनौद्वारा जारी वक्तव्यमा उल्लेख गरिएको छ ।

देशको उत्तरी सौम प्रान्तमा गत शनिबार घटना भएको बताइएको छ । घटनास्थल छिमेकीमुलुक मालीसँगको सीमा क्षेत्रमा पर्दछ । आक्रमणकारीहरुले गाउँका पुरुषहरुलाई छोपीछोपी हत्या गरेको र महिलाहरुलाई गाउँ छाड्न आदेश दिएको स्थानीयवासीले बताएका छन् । उनीहरुले ५० भन्दा बढी मारिएको बताएका छन् ।

घटना हुने वित्तिकै सुरक्षाकर्मीहरु गाउँमा पस्न पनि सकेका थिएनन् । आक्रमणकारीहरुको अवरोधका कारण उनीहरु पुग्न नसकेको बताइएको छ ।
जिहादीहरुका कारण बुर्किन फासोमा अहिलेसम्म ८ सय भन्दा बढी नागरिकको हत्या भएको छ भने ६ लाख भन्दा बढी विस्थापित भएका छन् । बुर्किन फासोमा सन् २०१५ देखि जिहादीहरुले हिंसा शुरु गरेका हुन् ।