प्रतिनिधिसभाका सभामुखको निर्वाचन आगामी आइतबार गर्ने सहमति

काठमाडौं । राजनीतिक दलहरुबीच प्रतिनिधिसभाका सभामुख चयनका लागि माघ १२ गते आइतबार निर्वाचन गर्ने सहमति भएको छ । आज बसेको कार्यव्यवस्था परामर्श समितिको बैठकमा दलहरुबीच सभामुखको निर्वाचन आगामी आइतबार गर्ने सहमति भएको समितिका सदस्य नेपाली काँग्रेसका प्रमुख सचेतक बालकृष्ण खाणले जानकारी दिनुभएको छ ।

सत्तारुढ दल नेकपाले अग्नि सापकोटालाई सभामुखको उम्मेदवार बनाउने निर्णय गरेको छ । त्यसका लागि उपसभामुख शिवमाया तुम्बाहाङ्फेले आजै आफ्नो पदबाट राजीनामा दिनुभएको छ। एकै दलबाट सभामुख र उपसभामुख बन्न नमिल्ने संवैधानिक व्यवस्था रहेकोले नेकपाबाट सभामुख सुनिश्चित गर्न तुम्बाहाङ्फेले राजीनामा दिनुभएको हो। संसद सचिवालयकी एकजना महिला कर्मचारीमाथि यौन दुव्यवहारको आरोप लागेपछि कृष्णबहादुर महराले गत असोज १४ गते राजीनामा दिएपछि सभामुख पद रिक्त भएको थियो ।