उपसभामुख तुम्बाहाङ्फेद्वारा पदबाट राजीनामा

काठमाडौँ । प्रतिनिधिसभाकी उपसभामुख शिवमाया तुम्बाहाङ्फेले आफ्नो पदबाट राजीनामा दिनुभएको छ । आज बसेको संसद बैठकमा उपसभामुख तुम्बाहाङ्फेले पदबाट राजीनामाको घोषणा गर्नुभएको हो । सभामुख चयन प्रकृया सहज बनाउनका लागि आफुले पदबाट राजीनामा दिएको उहाँले बताउनुभएको छ ।

उपसभामुख तुम्बाहाङ्फेले छोटो सम्बोधन गर्दै प्रतिनिधि सभाको सभामुख पद अप्रत्यासित र अश्वभाविक कारणले रिक्त रहेको र सभामुख नहुँदा जटिलता थपिएको बारेमा जानकार रहेको भन्दै संसदको ठूलो दलले सभामुखमा दावा गरेकाले आफुले सहजीकरण गर्न लागेको बताउनुभयो । सत्तारुढ नेकपाले हिजो नेता अग्नि सापकोटालाई सभामुखको उम्मेदवार बनाउने निर्णय गरेपछि तुम्बाहाङ्फेले राजीनामा दिनुभएको हो । उहाँ तत्कालीन एमालेबाट उपसभामुख हुनुभएको थियो ।

संविधानअनुसार एउटै दलबाट सभामुख र उपसभामुख हुन नपाउने व्यवस्था भएकोले नेकपाबाट सभामुखमा सापकोटालाई उठाउने भएपछि उपसभामुख तुम्बाहाङ्फेले राजीनामा दिनुभएको हो । उहाँको राजीनामाको घोषणाछि आजै साँझ ४ बजेसम्मका लागि संसद् बैठक स्थगित गरिएको छ । ४ बजे बस्ने संसद् बैठकले नयाँ सभामुख निर्वाचनको प्रक्रिया सुरुगर्ने बताइएको छ । त्यसका लागि संसद् सचिवालयले तयारी गरेको छ ।