‘ए’ डिभिजन लिग : जाउलाखेललाई हराउँदै मच्छिन्द्र शीर्ष स्थानमा

काठमाडौँ । मच्छिन्द्र क्लब जाउलाखेल युथ क्लबलाई हराउँदै शहीद स्मारक ‘ए’ डिभिजन लिग फुटबलको शीर्ष स्थानमा उक्लेको छ । त्रिपुरेश्वरस्थित दशरथ रङ्गशालामा आज भएको खेलमा मच्छिन्द्रले जाउलाखेललाई १–० गोलले पराजित गरेको हो । मछिन्द्रका लागि विशाल राईले निर्णायक गोल गरे । उनले खेलको ३१औँ मिनेटमा डिबक्स बाहिरबाट प्रहार गरेको बल गोलमा परिणत भएको थियो । मच्छिन्द्र छ खेलबाट १३ अङ्क जोड्दै आफूलाई लिगको शीर्ष स्थानमा राख्न सफल भएको छ ।

दशरथ रङ्गशालामा आज भएको अर्को खेलमा मनाङ मस्र्याङ्दीले हिमालयन शेर्पासँग गोलरहित बराबरी खेलेको छ । खेलको ७३औँ मिनेटमा मनाङका सुरज विकले रातो कार्ड पाएर मैदानबाट बाहिरिएका थिए । उनले हिमालयनका स्टेफेन समीरलाई फल गरेपछि रातोकार्ड पाएका हुन् । लिगमा मनाङ १२ अङ्कका साथ दोस्रो स्थानमा छ । हिमालयनसँग गोलरहित बराबरी खेल्दा मनाङ शीर्ष स्थानमा उक्लिन असफल भएको हो । मनाङले बराबरी खेल्दा त्यसको ठूलो फाइदा मच्छिन्द्रलाई पुगेको छ । मनाङले हिमालयनसित गोलरहित बराबरी खेल्दा मच्छिन्द्र शीर्ष स्थानमा पुग्न सफल भएको हो ।