महिला उद्यमी भेला मङ्सिर ३ र ४ गते काठमाडौँमा

काठमाडौँ । महिला उद्यमी महासङ्घ नेपालले यही मङ्सिर ३ र ४ गते काठमाडौँमा महिला उद्यमी भेला गर्ने भएको छ । उक्त भेलामा महिला उद्यमीले सञ्चालन गरेका उद्योगको अवस्था, वर्षेनी बढी रहेको व्यापार घाटा न्यूनीकरण गर्न उनीहरुले निर्वाह गर्नुपर्ने भूमिका, उद्यमशीलताको विकासका लागि महिलाको सहभागितालगायत विषयमा छलफल गरिने छ ।

देशका विभिन्न भागबाट आएका महिला उद्यमीबीच मङ्सिर ३ गते विभिन्न उद्योगको अवस्थाका विषयमा छलफल गरिने संस्थाका सदस्य रम्भा श्रेष्ठले जानकारी दिनुभयो । मङ्सिर ४ गते प्रज्ञा प्रतिष्ठानमा एक हजार महिला उद्यमीको भेला गरिने छ ।

करीब डेढ दशक अगाडि स्थापना भएको उक्त संस्थाले औद्योगिक नीति निर्माण तथा निर्णय प्रक्रियामा महिला उद्यमीको हक अधिकारका बारेमा वकालत गर्दै आएको छ । महिला उद्यमीको विकास एवं प्रवर्धनका लागि सक्रिय रहेको सो संस्थाले राष्ट्रिय तथा अन्तर्राष्ट्रियस्तरमा स्वदेशी उत्पादनको प्रवर्धनसमेत गर्ने गरेको छ ।