विपद् आउँदैछ भनेर ५५ हजार व्यक्तिलाई भाइबर सन्देश पठायौँः गृहमन्त्री लेखक

काठमाडौँ, १५ असोज । गृहमन्त्री रमेश लेखकले विपद् आउँदैछ भनेर ५५ हजार व्यक्तिलाई भाइबर सन्देश पठाएको बताएका छन् ।

मंगलबार राज्य व्यवस्था तथा सुशासन समितिको बैठकमा बोल्दै उनले असोज ११ र १२ गतेको अविरल वर्षाका कारण व्यापक धनजनको क्षति हुनुपूर्व सचेत रहन भन्दै ५५ हजार जनालाई भाइबरमार्फत सन्देश पठाएको बताएका हुन् । उनले मौसम विभागले गरेको पूर्वानुमान अनुसार विपद् प्रतिकार्य स्वरूप हिमाली क्षेत्रमा पदयात्रामा रोक लगाएको, राजमार्गमा रात्रि बस चलाउन रोक लगायतका निर्णय गरेर सम्बन्धित निकायलाई निर्देशन दिएको बताए ।

साथै स्थानीय तहका जनप्रतिनिधिलाई विपद् हुँदैछ भनेर सतर्कता सन्देश पठाउने काम गरेको, मातहतका निकायलाई सतर्क गराएको उल्लेख गरे ।

उनले आफूले विज्ञहरूसँग बुझ्दा ५० वर्ष भन्दा यताकै ठुलो वर्षा भएको, काठमाडौँ र बागमती प्रदेशमा क्वाउड ब्रस्ट भएको उल्लेख गरे । उनले यस्तो बेला सबै संयमित भएर विपद्‍को सामना गर्नुको विकल्प नभएको बताए ।

बाढी पहिरोबाट २१८ जना मृत्यु, १४३ घाइते, ७० भन्दा बढी बेपत्ता भएको र ४ हजार २२२ जनाको सुरक्षित उद्धार गरेको बताए ।