एकीकृत समाजवादी बैठक : महाधिवेशन प्रतिनिधिका विषयमा नेताहरूबीच मतभेद

काठमाडौं, १५ माघ । नेकपा (एकीकृत समाजवादी)मा आगामी महाधिवेशनको प्रतिनिधि चयनका विषयमा विवाद देखिएको छ ।

जारी केन्द्रीय परिषद्को बैठकमा आगामी जेठमा हुने महाधिवेशनका लागि केन्द्रीय कमिटीका सदस्यहरू तलबाट चुनिएर आउने कि स्वतः प्रतिनिधि हुने भन्नेमा विवाद देखिएको हो । सोही विषयमा विभाजित भएपछि केन्द्रीय परिषद्को बैठकमा भोटिङको तयारी भइरहेको एक नेताले जानकारी दिए ।

“महाधिवेशन प्रतिनिधिमा केन्द्रीय कमिटीका नेता तलबाट आउने कि स्वतः हुने भन्ने कुरामा बहस भइरहेको छ,” ती नेताले भने, “नेताहरू बीचमा पनि मत बाझिएको छ । शीर्ष नेताहरू अहिले बैठक बसिरहनुभएको छ ।”

त्यस्तै, केन्द्रीय कमिटीका पदाधिकारीको पद, संख्या लगायतका कुनै विषय अहिलेसम्म टुंगिएको छैन । नमिलेका विषय भोटिङमार्फत टुंग्याउने तयारी भएको छ ।

“कुनै पनि विषय टुंगिएको छैन । टोली नेताले समूहगतको छलफलको निष्कर्ष सुनाउने काम मात्रै भएको छ,” ती केन्द्रीय सदस्यले बाह्रखरीसँग भने ।

एकीकृत समाजवादीको केन्द्रीय परिषद् बैठक आइतबारदेखि कमलादीस्थित प्रज्ञा भवनमा जारी छ । आइतबारको बैठकका प्रतिनिधिहरूलाई १० समूहमा विभाजन गरेको थियो । समूहगत छलफलका लागि आइतबार साँझसम्मको समय तोकिएको थियो । आजको बैठकमा नेताहरूले छलफलको निष्कर्ष सुनाएका छन् । विधानको विषयमा आजै टुंगो लगाएर बैठक सकिने नेताहरूले बताएका छन् ।