नेपाल क्रिकेट संघमाथिको निलम्बन आईसीसीद्वारा सशर्त फुकुवा

काठमाण्डौ । नेपाल क्रिकेट संघ (क्यान) माथिको निलम्बन अन्तर्राष्ट्रिय क्रिकेट काउन्सिल (आईसीसी)ले सशर्त फुकुवा गरेको छ । आईसीसीको बोर्ड बैठकले साढे ३ वर्षअघि नेपालमा राजनीतिक हस्तक्षेप भएको भन्दै क्यानलाई निलम्बन गरेको थियो । दुबईमा बसेको आईसीसीका बैठकले नेपालसहित जिम्बाब्वे क्रिकेट संघमाथि लगाएको निलम्बन पनि फुकुवा गरेको छ ।

आईसीसीको बोर्ड बैठकमा क्यान निलम्बन फुकुवाबारे गम्भीर छलफल भएको बताइएको छ । चतुरबहादुर चन्द अध्यक्षमा निर्वाचित भएपछि राष्ट्रिय खेलकुद परिषद्ले उक्त अधिवेशनबाट निर्वाचित कार्यसमितिलाई मान्यता नदिएर नयाँ तदर्थ समिति गठन गरेको थियो । सो घटनापछि क्यानमा राजनीतिक हस्तक्षेप भएको ठहर गर्दै आईसीसीले निलम्बन गरेको थियो ।

निलम्बन फुकुवा गर्नका लागि आईसीसीले नेपाललाई आफ्नो रोडम्याप दिएको थियो । आईसीसीले दिएको रोडम्यापअनुसार विधान संशोधन गरेर जिल्ला, प्रदेश कार्यसमितिका साथै केन्द्रीय कार्यसमितिको निर्वाचन भएको थियो । यहि असोज ११ गते भएको निर्वाचनबाट पनि चन्द नै अध्यक्षमा निर्वाचित भएका छन् । आईसीसीका प्रतिनिधिको निगरानीमा भएको यो निर्वाचनलाई राखेपले मान्यता दिइसकेको छ भने आईसीसीले पनि स्वागत गरेको छ ।

आईसीसीले क्यान निलम्बनको फुकुवाका लागि आर्थिक पारदर्शीता, क्यानको कार्यालय व्यवस्थापनलगायत विषयलाई प्राथमिकतामा राखेको थियो । आईसीसीका अध्यक्ष शंशाक मनोहरले नेपाली क्रिकेटमा भएको प्रगतिलाई मध्यनजर गर्दै अब एसोसियट सदस्यको रुपमा सबै मापदण्ड परिपालना गराउनका लागि नेपाल क्रिकेट संघका लागि एउटा संक्रमणकालीन योजना पनि अघि सारिने र त्यसमा नियन्त्रित फण्डिङ पनि पर्ने बताउनुभएको छ ।