‘मौलाकालिका शान्ति दौड’को उपाधि राईलाई

भरतपुर । ‘२०औँ नारायणगढ लायन्स लियो खुला मौलाकालिका शान्ति दौड’ प्रतियोगिताको उपाधि गजेन्द्र राईले जित्नुभएको छ । चितवनको नारायणगढस्थित लायन्सचोकदेखि नवलपुरको गैँडाकोटस्थित मौलाकालिका मन्दिरसम्मको दूरी २५.४ मिनेटमा पार गर्दै सिरहाका गजेन्द्र राईले उपाधि जित्नुभएको हो ।

नारायणगढ लायन्स क्लब र लियो क्लब अफ नारायणगढको आयोजनामा भएको प्रतियोगितामा उहाँले नगद रु १५ हजार र प्रमाणपत्र प्राप्त गर्नुभयो । यस्तै २५.५ मिनेटमा दूरी पार गर्दै भोजपुरका सविन तामाङ द्वितीय हुनुभयो भने २७.१० मिनेटमा दूरी पार गर्दै जुम्लाका वीरेन्द्र रावल तृतीय हुनुभयो । उहाँहरुले क्रमशः रु १० हजार र पाँच हजार पुरस्कार प्राप्त गर्नुभयो ।

यस्तै चौथोदेखि १०औँ स्थान हासिल गरेका सात जनाले नगद रु एक/एक हजार सान्त्वना पुरस्कार प्राप्त गरेका नारायणगढ लायन्स क्लबका पूर्वअध्यक्ष सुरेश श्रेष्ठले जानकारी दिनुभयो । उहाँहरुलाई लायन्स इन्टरनेशनल डिष्ट्रिक्ट ३२५ बी टुका द्वितीय गर्भनर रामप्रसाद भट्टले पुरस्कार प्रदान गर्नुभयो । प्रत्येक वर्ष फूलपातीको दिन खुला शान्ति दौड प्रतियोगिता आयोजना हुँदै आएको छ । प्रतियोगितामा ४५ जना सहभागी थिए ।