भरतपुर महानगरमा शिक्षा, स्वास्थ्य, पर्यटन र अन्य क्षेत्रमा चिनियाँ राजदूत चेन सोङसँग सहयोगको प्रस्ताव

चितवन,२९ चैत। भरतपुर महानगरपालिकी मेयर रेनु दाहालसँग नेपालका लागि चिनियाँ राजदूत चेन सोङले शिष्टाचार भेटवार्ता गरेका छन् ।

भरतपुरमा बुधबार भएको भेटवार्तामा आपसी हित, दुई देशबीचको सम्बन्ध, भरतपुरसँग भगिनी सम्बन्ध भएका सहर, विकासमा भरतपुर र चीनबीच गर्न सकिने सहकार्यको बारेमा छलफल भएको छ ।

महानगरपालिकाकी मेयर रेनु दाहालले मित्र राष्ट्र चीन र नेपालको दौत्य सम्बन्ध कायम भएसँगै चीनले नेपालको पूर्वाधार विकास शिक्षा, स्वास्थ्यका साथै आर्थिक सामाजिक क्षेत्रमा नेपाली जनताको मन जित्ने गरी सहयोग पु¥याएकोमा राजदूत चेनलाई धन्यवाद व्यक्त गरिन् । महानगरपालिकाकी मेयर दाहालले महानगरीय मेट्रो रेल, नेपाल चाईनामैत्री पार्क निर्माण चीनको सहयोगमा निर्माणको लागि प्रस्ताव गरेकी छन् । उनले भरतपुरको विकासमा चिनियाँ प्राविधिक समूह उपलब्ध गराई नमूना महानगर निर्माणको लागि पनि आह्वान गरिन् ।

भरतपुरको शिक्षा, स्वास्थ्य, पर्यटन र अन्य क्षेत्रमा चीनको आवश्यक स्रोतसाधनको उपलब्धताले दीगो विकासमा सहयोग पुग्ने प्रमुख दाहालले बताइन् ।
मेयर दाहालले भरतपुर भ्रमण वर्ष २०२४ मा चिनियाँ राजदूत चेनमार्फत चिनियाँ पर्यटकलाई निम्तो पनि दिइन् । नेपालका लागि चिनियाँ राजदूत चेनले भरतपुरमा महानगरीय मेट्रो रेल, नेपाल चीनमैत्री पार्र्क, शिक्षा, स्वास्थ्य लगायतका विषयमा छलफल गरी अगाडि बढ्न सकारात्मक रहेको उल्लेख गरे ।
राजदूत चेनले भरतपुर भ्रमण वर्ष २०२४ मा चीनबाट बढीभन्दा बढी पर्यटक आउने वातावरण निर्माण गर्ने उल्लेख गरे । राजदूत चेनले भरतपुरमा भइरहको तीव्र विकास निर्माणबारे आफू जानकार रहेको बताउँदै प्रमुख दाहालको प्रशंसा पनि गरे । सात सदस्यीय टोलीसहित भरतपुर आइपुगेका भएको राजदूत चेनले भरतपुरको विकासको बारेमा स्थलगत अवलोकनसमेत गरेका छन् ।