चितवनमा सञ्चालित सुपथ मूल्य पसल : चिनी नहुँदा रित्तो हात फर्किन वाध्य उपभोक्ता

चितवन,१६ आश्विन। चाडपर्वमा सामान्यतया चिनीको माग बढी हुन्छ । दसैं, तिहार र छठ जस्ता चाडपर्वको समयमा सबैको घरमा चिनी प्रयोग हुने परिकार बढी पाक्ने गर्छ । तर यिनै चाडपर्व लक्षित सुपथ मूल्य पसलमा भने चिनी नै छैन ।

साल्ट ट्रेडिङ कर्पोरेसनले चितवनको नारायणगढमा सञ्चालन गरेको चाडपर्व लक्षित सुपथ मूल्य पसलमा चिनी छैन । असोज १ गतेदेखि सुपथ मूल्य पसलमा सञ्चालन त आयो, तर दुई साता वितिसक्दा पनि चिनी भने आएन ।

चिनी पाउने आशमा उपभोक्ताहरु सधैं जस्तो सुपथ मूल्य पसल धाउँछन् । तर चिनी नपाउँदा रित्तो हात घर फर्किन वाध्य हुन्छन् । साल्ट ट्रेडिङबाट नै चिनी नआउँदा उपभोक्ताहरुलाई रित्तो हात फर्काउनु परेको कार्यालय प्रमुख वुद्धिविनोद दाहालले बताउँछन् । उनका अनुसार प्राय सबै जस्तो ग्राहक सबै भन्दा पहिला चिनी खोज्छन् । तर चिनी नपाएपछि खाली हात फर्किन्छन् ।

‘ग्राहकले पहिला सोध्ने र खोज्ने नै चिनी हो । चिनी नखोज्ने ग्राहक कोही हुँदैनन् । तर चिनी छैन । ग्राहकले चिनी नसोध्ने कोही पनि हुनुहुन्, दाहाल भन्छन्, ‘तर चिनी नै छैन । चिनी नपाएपछि धेरै ग्राहक रित्तो हात फर्किन्छन् ।’ ग्राहकलाई रित्तो हात फर्काउन पर्दा खल्लो लाग्ने गरेको उनी सुनाउँछन् ।

चिनी नहुँदा व्यापार पनि अपेक्षित हुन नसकेको उनी बताउँछन् । हालसम्मा १० लाख बराबरको मात्रै व्यापार भएको दाहाल सुनाउँछन् । चिनी उपलब्ध गराउन केन्द्रसँग माग गरिएको उनी बताउँछन् । गत वर्ष पनि सुपथ मूल्य पसलमा चिनी अभाव देखिएको थियो ।

सुपथ मूल्य पसलमा अहिले चामल, दाल, सनफ्लावर तेल, तोरीको तेल, चिउरा, चना, केराउ, मैदा, पिठो, गेडागूडी, साबुन, चियापत्ती, मसला, सर्फलगायतका सामाग्री उपलब्ध छन् ।

प्रमुख दाहालका अनुसार सुपथ मूल्य पसलमा प्रतिलिटर तेल बजार मूल्य भन्दा ७ रुपैयाँ सस्तोमा पाइन्छ । यस्तै नुन प्रतिकिलो २ रुपैयाँ र चिउरामा ४ रुपैयाँसम्म छुट दिइएको छ ।

साल्ट ट्रेडिङमा सेफ सनफ्लावर तेल प्रतिलिटर २८५ रुपैयाँ र तोरी तेल प्रति लिटर २७५ रुपैयाँ कायम गरिएको छ । नुनको मूल्यमा प्रति किलो १८ रुपैयाँ र झुरुम चिउरा ८० रुपैयाँ कायम गरिएको छ ।

साल्ट ट्रेडिङले भान्साघर ५ किलोको ७७० रुपैयाँ, माइतिघर २५ किलोको १ हजार ८४५ रुपैयाँ र मंगलम २५ किलोको १ हजार ९३५ रुपैयाँ कायम गरेको छ ।

यस्तै चना प्रतिकिलो १०५ रुपैयाँ, हरियो केराउ १२० रुपैयाँ र काबुलि चना १८० रुपैयाँ कायम गरिएको दाहालले बताए । उनका अनुसार मन श्री मैदा २ केजीको १६५, मन श्री पिठो २ केजीको १६०, मन श्री पिठो ५ केजीको ३७०, हिवालिङ पिठो २ केजी १६० र हिवालिङ पिठो ५ केजीको ३५७ रुपैयाँ छ ।

सुपथ मूल्य पसलबाट नुन प्रतिव्यक्ति अधिकतम ६ केजीसम्म उपलब्ध गराइने उनले बताए । अन्य खाद्यान्न भने ग्राहकले आवश्यक अनुसार लैजान सक्नेछन् । सुपथ मूल्य पसल कात्तिकको १३ गतेसम्म सञ्चालन हुने छ ।