चितवनमा बन्दको आंशिक प्रभाव

चितवन,७ भाद्र । चितवनमा नेत्रविक्रम चन्द विप्लव नेतृत्वको नेकपाले आह्वान गरेको नेपाल बन्दको आंशिक प्रभाव परेको छ।बन्दका कारण चितवनको नारायणगढ बजार बिहानैबाट सुनसान रहेको छ । नारायणगढ बजारका एकाध बाहेक अधिकांश पसलहरु बन्द रहेका छन् । यस्तै भरतपुरका पनि अधिकांश पसलहरु बन्द रहेका छन् ।

पसलहरु बस्तारै खुल्न थालेको जिल्ला प्रहरी कार्यालय चितवनले जानकारी दिएको छ । यस्तै चितवन हुँदै गूड्ने लामो दुरीका सवारी साधनहरु चलिरहेको जिल्ला ट्राफिक प्रमुख धर्मबदाहुर अधिकारीले बताए । छोटो दुरीका सवारी साधन भने फाट्टफुट्ट चलिरहेको उनके बताए । ‘बन्दको प्रभाव आंशिक छ । पूर्व पश्चिमबाट आउने गाडीहरु रोकिएका छैनन्। छोटो दुरीका गाडीहरु चाहिँ फाट्टफुट्ट चलेका छन्’, उनले भने । मोटरसाइकल भने निर्वाध रुपमा चलिरहेका छन् ।

यता प्रहरीले बन्द गराउँदै हिड्ने सात जनालाई पक्राउ गरेको छ । बन्दको अवज्ञा गरेको भन्दै ६ वटा सवारी साधनमा तोडफोड समेत भएको छ ।नेत्रविक्रम चन्द ‘विप्लव नेपाल कम्युनिष्ट पार्टीसहित चार दलले तत्कालिन केपी ओलीको सरकारसँग भएको तीन बुँदे सहमति कार्यान्वयन गर्न माग गरेको छ । सहमति कार्यान्वयन गर्नुको साटो उल्टै नेकपाका नेता कार्यकर्ता विरुद्ध पक्राउ पुर्जी जारी भएको भन्दै आज बन्द गरेको हो ।उनीहरुले नेकपासँगको सहमति कार्यान्वयनसँगै एमसिसी सम्झौता खारेज गर्नुपर्ने, बढ्दो महंगी र भ्रष्टाचार नियन्त्रण गर्नुपर्ने र आफ्नो नेता कार्यकर्तामाथि लगाइएको झुठा मुद्धा खारेज गर्नुपर्ने माग राखेका छन् ।