बस र अटो आपसमा ठोक्किँदा ३ जनाको मृत्यु, एक घाइते

रौतहट,२ भाद्र। रौतहटको चन्द्रपुरमा बस र अटो एक आपसमा ठोक्किँदा ३ जनाको मृत्यु भएको छ ।

मृत्यु हुनेमा अटोमा सवार सर्लाही–२ सोल्टी बस्ने ढकबहादुर लुंगेली मगर, प्रेम ठाडा मगर र अटो चालक रवि मगर छन्। अर्का एक जना घाइते भएका छन् । दुर्घटनामा घाइते भएकी ढकबहादुरकी श्रीमती सविना लुंगेलीको चन्द्रपुर अस्पतालमा प्रारम्भिक उपचारपछि वीरगन्ज पठाइएको इलाका प्रहरी कार्यालय चन्द्रनिगाहापुरले जानकारी दिएको छ ।

आज (बिहीबार) बिहान ४ बजे पूर्व पश्चिम महेन्द्र राजमार्ग अन्तर्गत चन्द्रपुर-२ लच्का नजिकै काठमाडौंबाट सर्लाहीको बयलबासतर्फ जाँदै गरेको बाग्मती प्रदेश ०३–००१ ख २०१ नम्बरको बस र बागमतीबाट विरामी लिएर वीरगन्ज जाँदै गरेको प्रदेश २–०२–००१ ह २१०९ नम्बरको अटो आपसमा ठोक्किँएको हो । बस तथा चालक प्रहरीको नियन्त्रणमा रहेका छन् ।