भरतपुरका सबै वडामा छोरी बीमा कार्यक्रम कार्यान्वयन गर्न पत्राचार

भरतपुर,१३ श्रावण। भरतपुर महानगरपालिकाको स्वास्थ्य तथा सामाजिक बिकास महाशाखाले ‘छोरी जीवन बीमा’ कार्यक्रम कार्यान्वयन गर्न/गराउन पत्राचार गरेको छ ।

महाशाखाले सबै वडालाई उक्त कार्यक्रम तत्काल कार्यान्वयन गर्न गराउन पत्राचार गरेको हो । पत्रमा गत आर्थिक वर्ष ०७८/७९ को जेष्ठ १ गतेदेखि नै लागू हुने गरी उक्त कार्यक्रम कार्यान्वयन गर्न भनिएको छ ।

साउन ८ गते बसेको बीमा कार्यान्वयन समितिको बैठकले कार्यक्रम कार्यान्वयन गराउन पत्राचार गर्ने तथा आवश्यक प्रमाण पुगेका कागजात महाशाखा अन्तर्गत महिला बालबालिका तथा समाज कल्याण शाखामा पठाउने र अभिभावकबाट निवेदन संकलन गर्ने कार्यलाई तिव्रता दिने निर्णय गरेको थियो । सोही निर्णय अनुसार सबै वडालाई पत्रचार गरिएको महाशाखा प्रमुख शान्ताकुमारी पौडेलले जानकारी दिईन् ।

दोस्रो कार्यकालका लागि भरतपुर महानगरको मेयरमा निर्वाचित भएपछि पदभार ग्रहणका क्रममा रेनु दाहालले छोरी जीवन बीमा कार्यक्रम घोषणा गरेकी थिईन् । भरतपुरमा जन्मिने छोरीलाई नि:शुल्क बीमा गर्ने उनको दोस्रो कार्यकालको पहिलो निर्णय थियो ।

उक्त निर्णय गत असार २९ गते बसेको नगरकार्यपालिकाको बैठकबाट स्वीकृत तथा असार ३१ गते प्रमाणिकरण भएको थियो । उक्त बीमा १५ वर्ष अवधिको हुनेछ । मेयर दाहालको उक्त निर्णयको सबैको प्रशंसा गरेका थिए ।