पत्रकार महासंघले भन्यो : अफवाह र भ्रम फैलाउने समाचार सम्प्रेषण गरेको पाईयो

चितवन, २६ वैशाख । नेपाल पत्रकार महासंघ चितवन शाखाले केही सञ्चार माध्यमले कर्तव्य भुलेर समाजमा अफवाह र भ्रम फैलाउने समाचार सम्प्रेषण गरेको जनाएको छ । महासंघ चितवनका सचिव दीपेन्द्र अधिकारीले आज एक विज्ञप्ति प्रकाशित गरी सामाजिक उत्तरदायित्वलाई आत्मसाथ गर्दै समाचार सम्प्रेषण गर्न अनुरोध गर्नुभएको हो ।

विज्ञप्तिमा महासंघ, प्रेस काउन्सिल नेपाल र निर्वाचन आयोगको पत्रकार आचारसंहिता पूर्ण रुपमा पालना गरी पत्रकारितालाई स्वच्छ, मर्यादित, विश्वसनीय बनाउन सबै सञ्चारकर्मीहरुलाई आव्हान गरिएको छ ।

विज्ञप्तिमा अगाडि भनिएको छ “निर्वाचनलाई सफल, भयरहित र निष्पक्ष बनाउन पत्रकारिता क्षेत्रको भूमिका महत्वपूर्ण हुने भएकाले सोही अनुसार आफूलाई प्रस्तुत गर्नुहुन आग्रह गर्दछौं ।” महासंघले सामाजिक सञ्जालमा अनावश्यक टिकाटिप्पणी नगर्न, सम्बन्धित निकायमा दर्ता गरेर मात्रै सञ्चारमाध्यम सञ्चालन गर्न समेत अनुरोध गरेको छ ।

निर्वाचनको अवधिभर सहज रुपमा सूचना संकलन गर्न आवश्यक सहजीकरणका लागि स्थानीय प्रशासनसँग महासंघले आग्रह गरेको छ । पत्रकारहरुलाई पनि आफ्नो परिचयपत्र साथमा लिएर मात्रै समाचार संकलनमा जान भनिएको छ ।

हिजो साँझ भरतपुरमा एक जनाको हत्या भएपछि उक्त घटनालाई जोडेर यहाँका केही सञ्चारमाध्यमहरुले भ्रम र उत्तेजना फैलिने किसिमलेसमाचार प्रकाशित गरेका थिए । ती समाचारको सर्वत्र भत्र्सना भएको छ ।