रत्ननगरमा गठबन्धनबीच छलफल जारी, माओवादी केन्द्रले मित्रवत् प्रतिस्पर्धा गर्ने

रत्ननगर,१२ बैशाख। रत्ननगर नगरपालिकामा गठबन्धन दलले वडाध्यक्षमा अझै टुङ्गो लगाउन सकेको छैन । गठबन्धन दलका नेताहरुबीच छलफल चलिरहँदा नेकपा (माओवादी केन्द्र) रत्ननगर नगरसमितिले आइतबार बेलुकी विज्ञप्ति जारी गर्दै गठबन्धन समन्वय समितिले चितवनका सात पालिकाको प्रमुख र उपप्रमुखको टुङ्गो लगाउँदा रत्ननगरमा आफ्नो पार्टीको प्रतिनिधित्व नभएको भन्दै ध्यानाकर्षण गराएको छ ।

वडाध्यक्षको बाँडफाटमा आफ्नो पार्टीको सदस्य संख्या, भौगोलिक अवस्था र जनमतको आधारविपरीत रहेको ठहर गर्दै नेकपा (माओवादी केन्द्र) रत्ननगर नगरसमितिले रत्ननगरका १६ वटै वडामा सबै राजनीतिक दलहरुसँग मित्रवत् प्रतिस्पर्धा गरी निर्वाचनमा भाग लिने जनाएको छ ।

पार्टीका नगर उपाध्यक्ष प्रदीपकुमार बञ्जाराका अनुसार गठबन्धनले आफ्नो पार्टीलाई सम्मानजनक ढङ्गले उमेदवार चयन गर्न कन्जुस्याइँ गरेकाले गठबन्धनको मूल मर्मप्रति सहमति प्रकट गर्दै रत्ननगरमा माओवादी एक्लै दलहरुसँग प्रतिस्पर्धा गर्ने जानकारी दिए । उनका अनुसार आफूहरुले सहमतिको प्रयास जारी नै राखेकाले मिल्न सक्ने सम्भावना अन्त्य भइनसकेको बताए ।