जनक मावि प्रकरण : आरोपित शिक्षकविरूद्ध छात्राले दिइन् जाहेरी

गैँडाकोट,६ बैशाख – नवलपुरको गैँडाकोट नगरपालिका स्थित जनक माविका शिक्षकले आफुमाथि यौन दुर्व्यवहार गरेको भन्दै छात्राले जाहेरी दिएकी छन् ।

कक्षा १२ मा अध्ययनरत छात्राले सोही विद्यालयका शिक्षकविरुद्ध जिल्ला प्रहरी कार्यालय नवलपुरमा जाहेरी दिएकी हुन् । शिक्षकले आफूविरूद्ध यौन हिंसा र अभद्र व्यवहार गरेको जाहेरीमा भनिएको छ । आरोपित शिक्षकविरुद्ध सार्वजनिक तथा नैतिकताविरूद्धको कसुरमा जाहेरी दर्ता गरेको प्रहरी उपरीक्षक प्रज्वल महर्जनले जानकारी दिए।

उनका अनुसार नियन्त्रणमा लिइएका शिक्षकलाई अदालतबाट सात दिन हिरासतमा राख्ने म्याद लिएर प्रहरीले अनुसन्धान सुरू गरेको छ। जाहेरी दर्ता गरेकी छात्राले शिक्षकले अश्लील भिडिओ देखाउने, संवेदनशील अंगमा छुने, शारीरिक सम्बन्धका कुरा गर्ने गरेको बताइन्।

छात्राका अनुसार शिक्षकले फेसबुक म्यासेन्जरबाट म्यासेज पठाएर विद्यालयको ल्याबमा बोलाएका थिए। ल्याबमा बोलाएर अश्लील भिडिओ देखाउने, संवेदनशील अंगमा छुने गरेपछि उनले प्रतिवाद गरेर साथीहरुलाई घटना सुनाएकी थिईन् ।

शिक्षकले छात्रामाथि यौन दुर्व्यवहार गरेको भन्दै आइतबार उक्त विद्यालयका विद्यार्थीले प्रदर्शन गरेका थिए। अभद्र व्यवहार गरेको जानकारी दिँदा पनि विद्यालय प्रशासनले बेवास्ता गरेको भन्दै विद्यार्थीहरूले विद्यालयमा तोडफोड र आगजनी गरेका थिए।

आरोपित शिक्षकलैइ नियन्त्रणमा लिई अदालतबाट सात दिन हिरासतमा राख्ने म्याद गरी प्रहरीले अनुसन्धान अघि बढाईएको प्रहरीले जनाएको छ । घटनापछि विद्यालयको पठन पाठन ठप्प छ ।