अध्यक्ष ओलीद्वारा एकैदिन मुलुकका ७५३ वटै पार्टीका कमिटीलाई सम्बोधन

काठमाडौँ,१६ चैत्र। प्रमुख प्रतिपक्ष दल नेकपा (एमाले) का अध्यक्ष केपी शर्मा ओलीले आशन्न स्थानीय तहको निर्वाचनको तयारीका लागि आज मुलुकका ७५३ वटै पार्टीका कमिटीका पदाधिकारीलाई सम्बोधन गरेका छन् ।

एमालेले आसन्न स्थानीय तहको निर्वाचनका लागि प्रतिबद्धता-पत्र तयारी भर्चुअल कार्यशाला आयोजना गरेको हो । अध्यक्ष ओलीले विगतका केन्द्र, प्रदेश र स्थानीय तहमा नेकपा (एमाले) का सरकारहरूले गरेका गौरवपूर्ण कामहरू लिएर जनतामा जान निर्देशन दिएका छन् ।

आज स्थानीय तहको निर्वाचन प्रतिबद्धता-पत्र तयारी कार्यशालालाई सम्बोधन गर्ने क्रममा अध्यक्ष ओलीले गठबन्धनका बारेमा भने, ‘गठबन्धन उहॉहरूको छनोट होइन, बाध्यता हो । बाघ देख्यो भने हरिण कुद्छ । यो हरिणको कुनै छनोट होइन, बाध्यता हो । नत्र त बाघले खाइहाल्छ ।’

ओलीले थप्दै भने, ‘एमालेलाई अगाडि देखेपछि गठबन्धन गर्नुपरेन त ? तर, यसले हामीलाई फरक पार्दैन । दिनदिनै हजारौं मानिसले एमालेमा प्रवेश गरिरहनुभएको छ । हाम्रो विजय सुननिश्तित छ ।’

पूर्वप्रधानमन्त्री ओलीले निर्वाचन घोषणापत्रका लागि परामर्श र पार्टीका नीतिबारे स्पष्ट पार्न एकैदिन प्रविधिमार्फत सम्बोधन गरेका हुन् । सो पार्टीको ११ चैत्र ११ गते शुक्रबार सम्पन्न केन्द्रीय कमिटीको तेस्रो बैठकले आजको कार्यक्रम तय गरेको थियो ।

आगामी वैशाख ९ गते नेपाल कम्युनिष्ट पार्टी स्थापना दिवसका अवसर पारेर केन्द्रमा निर्वाचन घोषणापत्र र स्थानीय तहमा पार्टीका तर्फबाट प्रतिबद्धतापत्र सार्वजनिक गरेको हो ।

एमाले एक पार्टी र अरु सबै एक पार्टी भएकाले कुनै दुविधाविना निर्वाचनमा हाोमिन पनि उनले निर्देशन दिए । प्रतिबद्धता-पत्र मस्यौदा समितिका संयोजक तथा बरिष्ठ उपाध्यक्ष कमरेड ईश्वर पोखरेलले प्रतिबद्धता-पत्रका सैद्धान्तिक पक्षमाथि प्रकाश पारेका थिए ।

मस्यौदा समितिका सदस्य सुशील ज्ञवालीले प्रतिबद्धता-पत्रका बारेमा विस्तृत रूपमा व्याख्या गरे । कार्यक्रममा स्थायी कमिटीका सदस्यहरू, प्रदेश र जिल्ला कमिटीका पदधिकारीहरू र पार्टीबाच निर्वाचित पालिका प्रमुखहरू सहभागी थिए । उनीहरुले पार्टीबाट गरिएका अपेक्षाहरू राखेका थिए ।