चितवनमा म्यादी प्रहरी : मागभन्दा तीन गुणाबढीले दिए आवेदन

भरतपुर,१३ चैत्र।  चितवनमा म्यादी प्रहरीको माग भन्दा तीन गुणाबढीले आवेदन दिएको जिल्ला प्रहरी कार्यालय चितवनले जानकारी दिएको छ । वैशाख ३० गते हुन लागेको स्थानीय तहको निर्वाचनका लागि चितवनमा एक हजार ७०९ म्यादी प्रहरीको माग भएको थियो ।

निर्धारित समय चैत ११ गतेसम्म चार हजार ३३ पुरूष र एक हजार ४३३ महिला गरी जम्मा पाँच हजार ४६६ जनाले आवेदन दिएको जिल्ला प्रहरी कार्यालय चितवनका प्रवक्ता एवं डिएसपी नरहरि अधिकारीले जानकारी दिए ।

अन्तिम दिन चैत ११ गते मात्रै एक हजार २७ पुरूष र २९३ महिला गरी एक हजार ३२० जनाले म्यादी प्रहरीका लागि आवेदन दिएका थिए । चितवनमा चैत ६ गतेदेखि म्यादी प्रहरीको लागि आवेदन खुला गरिएको थियो । आवेदन खुला भएसँगै म्यादी प्रहरीको लागि आवेदन दिनेको भीड लागेको थियो ।

१८ वर्ष पूरा भई ५४ वर्ष ननाघेका कुनै पनि नेपाली नागरिकले म्यादी प्रहरीका लागि फाराम भर्न सक्ने भनिएको थियो । आवेदन दिएर छनोट भएका म्यादी प्रहरीले ४० दिन काम गर्न पाउनेछन् ।

आवेदन दिएकाले चैत १३ गते प्रहरी कार्यालयमा सम्पर्क गर्नुपर्ने अधिकारीले बताए । चैत १५ गतेदेखि शारीरिक परीक्षण गरेर चैत २२ गते म्यादी प्रहरीको अन्तिम नामावली प्रकाशन गरिनेछ । म्यादी प्रहरीलाई चैत २८ गतेदेखि तालिम दिएर स्थानीय तहको चुनावमा ४० दिन काममा खटाइने छ ।

म्यादी प्रहरीले तलब, पोसाक भत्ता, अन्य सामग्री खरिदका लागि ४० दिनको ४४ हजार ४४० रूपैयाँ पाउनेछन् ।