ट्याङकरले मोटरसाइकललाई ठक्कर दिंदा श्रीमतीको मृत्यु, श्रीमान् र छोरी घाइते

चितवन, २ फागुन । नारायणगढ मुग्लिन सडक खण्डको जलवीरेमा ट्याङकरले मोटरसाइकललाई ठक्कर दिँदा मोटरसाइकलमा सवार एक जनाको मृत्यु भएको छ भने दुई जना घाईते भएका छन् ।

जिल्ला प्रहरी कार्यालय चितवनका अनुसार मुग्लिनबाट नारायणगढ आउँदै गरेको ना ७ ख ८१४१ नम्बरको तेल बोक्ने ट्याङकरले नारायणगढबाट मुग्लिनतर्फ जाँदै गरेको ना ३२ प ८२४८ नम्बरको मोटरसाइकललाई ठक्कर दिँदा दुर्घटना भएको हो । घटनामा परी भरतपुर महानगरपालिका वडा नं. १८ की ३१ वर्षीया अम्बिसा गुरुङको मृत्यु भएको छ । उनको कलेज अफ मेडिकल साईन्सेस शिक्षण अस्पताल (पुरानो मेडिकल कलेज) मा उपचारको क्रममा मृत्यु भएको प्रहरीले जनाएको छ ।

दुर्घटनामा मृतक गुरुङको तीन वर्षीया छोरी र श्रीमान् घाइते भएका छन् । उनीहरुको सोही अस्पतालमा उपचार भइरहेको छ ।