ब्राजिलमा कोरोनाबाट ज्यान गुमाउनेको संख्या ५ लाख नाघ्यो

काठमाडौँ, ६ असार । ब्राजिलमा कोभिड–१९ बाट मृत्यु हुनेको संख्या ५ लाख नाघेको छ । यो आँकडा विश्वकै दोस्रो हो । सुस्त खोप अभियान र जाडो मौसमको सुरुवातसँगै स्थिति अझै खराब हुनसक्ने विज्ञहरुले चेतावनी दिएका छन् ।

राष्ट्रपति जार बोल्सोनारोले सामाजिक दुरीजस्ता नियमहरु पालना गराउन चासो नदिँदा संक्रमण तीव्र गतिमा फैलिरहेको छ । फियोक्रुज नामक स्वास्थ्य संस्थाका अनुसार हालसम्म १५ प्रतिशत वयस्कहरुले मात्र पूर्ण मात्रामा खोप लगाएका छन् ।

कंग्रेसले महामारीलाई नियन्त्रण गर्न सरकारले चालेको कदमबारे अनुसन्धान गरिरहेको छ । संगठितरुपमा राष्ट्रिय अभियान लागू नगरेको, खोपप्रति सन्देह देखाएको, लकडाउन र मास्क लगाउनुपर्ने नियमलाई बेवास्ता गरेकोमा राष्ट्रपति बोल्सोनारोको आलोचना हुँदै आएको छ ।

विपक्षीले उनीमाथि राजनीतिक स्वार्थका लागि खोप खरिदमा ढिलाइ गरेको र महामारीको गम्भीरतालाई बेवास्ता गरेको आरोप लगाउँदै आएका छन् ।

ब्राजिलमा ‘गामा’ नामक कोरोनाभाइरसको निकै संक्रामक भेरियन्ट सक्रिय रहेको छ । पछिल्लो एक हप्तामा ब्राजिलमा दैनिक ७० हजार बढी संक्रमित फेला परिरहेका छन् । प्रत्येक राज्यमा आईसीयूमा ८० प्रतिशत वा सोभन्दा बढी बिरामीहरुले भरिएका छन् । ब्राजिलमा १ करोड ७८ लाखभन्दा बढी संक्रमित भइसकेका छन् । बीबीसी