चितवन समाज अष्ट्रेलियाद्वारा भरतपुर अस्पताललाई १० थान अक्सिजन सिलिण्डर सहयोग

चितवन, ३१ वैशाख । कोभिड शैया थप गरेसँगै भरतपुर अस्पतालमा स्वास्थ्य सामग्री अभाव भएपछि विभिन्न संस्था तथा व्यक्तिहरुबाट सहयोग जुट्न थालेको छ । अक्सिजन सिलिण्डर, पिपिई, माक्स लगायतका स्वास्थ्य सामग्री अभाव भएको हो ।

चितवनमा मूल घर भएर अष्ट्रेलियामा बसोबास गर्ने नेपालीहरुको संस्था चितवन समाज अष्ट्रेलियाले आज शुक्रबार अस्पताललाई अक्सिजन ग्यास सहयोग गरेको छ । समाजले अष्ट्रेलियाबाट अक्सिजन ग्यास उद्योगलाई रकम पठाएर धरौटी राखी ठूलो १० थान अक्सिजन सिलिण्डर उपलव्ध गराएको हो ।

ओमसञ्जीवनी अक्सिजन सप्लायर्सका सञ्चालक निरञ्जन न्यौपानेले आज ती सिलिण्डर भरतपुर अस्पताल विकास समितिका अध्यक्ष डा. भोजराज अधिकारी र निमित्त मेडिकल सुपरिटेण्डेन्ट डा. जगन्नाथ तिवारीलाई हस्तान्तरण गर्नुभयो । सो अवसरमा अधिकारीले समाजका अध्यक्ष पूर्ण घिमिरेले अस्पताललाई थप सहयोग गर्ने आश्वासन समेत दिएको जानकारी गराउनु भयो ।

प्रबासमा रहेर पनि जिल्लावासी प्रतिको मायाँको उहाँले गरेको सहयोगको अधिकारीले प्रशंसा गर्नु भयो । कार्यक्रममा तिवारीले भन्नुभयो “हामीलाई यहाँ अक्सिजनको हाँहाँकार छ । तत्काल यसलाई जोडेर बिरामीलाई अक्सिजन दिनु पर्ने बाध्यता रहेको छ ।” अक्सिजन सिलिण्डर हस्तान्तरण समारोहमा नेपाल पत्रकार महासंघ चितवनका अध्यक्ष नारायण अधिकारी, सल्लाहाकार तिलकराम रिमाल लगायतको उपस्थिति रहेको थियो ।

घिमिरेको अध्यक्षतामा रहेको समाजले संस्थाका संरक्षक केशबप्रसाद सापकोटाको संयोजकत्वमा स्वयं घिमिरे, विकास बर्ताैला, सिता सुवेदी र श्यामसुन्दर गिरी सदस्य रहेको आर्थिक संकलन समिति बनाएर सहयोग जुटाएको हो । घिमिरेले संकलित रकम चितवन जिल्लामा मानवीय कल्याणको काममा सहयोग गर्ने बताउनुभयो ।