कोरोना : दश लाखभन्दा धेरैमा सङ्क्रमण निको भयो, उपचाररत मध्ये तीन प्रतिशतको अवस्था मात्र जटिल

काठमाण्डौँ । विश्वका विभिन्न देशमा महामारीको रुपमा देखापरेको कोरोनाभाइरस (कोभिड–१९) संक्रमित मध्ये १० लाखभन्दा धेरै मानिसलाई निको भएको छ । दुई सय १० देशमा कोरोनाभाइरस फैलिँदा ३२ लाख २० हजार जनाभन्दा धेरैमा सङ्क्रमण पुष्टि भएकोमा पछिल्लो अपडेटअनुसार १० लाख तीन सय ५५ जनालाई निको भएको वल्डवमिटरले जनाएको छ ।

त्यस्तै सङ्क्रमितमध्ये दुई लाख २८ हजार दुई सय ३६ जनाको मृत्यु भएको छ । त्यस्तै, १९ लाख ९० हजारभन्दा धेरैको उपचार भइरहेको छ । उपचार गराइरहेकामध्ये ३ प्रतिशतको अवस्था जटिल रहेको र बाँकीको अवस्था सामान्य तथा मध्यम रहेको वल्डवमिटले जनाएको छ ।

कोरोनाबाट पछिल्लो २४ घण्टामा विभिन्न देशमा साढे ६ हजारभन्दा धेरैको ज्यान गएको छ । ज्यान गुमाउने र सङ्क्रमित हुनेको सङ्ख्या सबैभन्दा धेरै संयुक्त राज्य अमेरिकाको छ ।

अमेरिकामा गएको २४ घण्टामा मात्रै दुई हजार तीन सयभन्दा धेरैको ज्यान गएको छ । अमेरिकामा ज्यान गुमाउनेको सङ्ख्या ६१ हजार छ सय नाघिसकेको छ । यस्तै १० लाख ६४ हजारभन्दा धेरैमा सङ्क्रमण पुष्टि भएको छ । यस्तै इटलीमा साढे २७ हजारभन्दा धेरै, बेलायतमा २६ हजारभन्दा धेरै, स्पेन र फ्रान्समा २४ हजारभन्दा धेरैको ज्यान गएको छ ।

भारतमा ३३ हजारभन्दा धेरैमा कोरोना पुष्टि भएकोमा एक हजारभन्दा धेरैको ज्यान गएको छ ।