कोरोनाभाइरस सङ्क्रमणबाट मृत्यु हुनेको सङ्ख्या दुई लाख नाघ्यो

काठमाडौँ । कोरोनाभाइरस (कोभिड–१९) को सङ्क्रमणबाट मृत्यु हुनेको सङ्ख्या दुई लाख नाघेको छ । वल्र्डवमिटरको पछिल्लो तथ्याङ्क अनुसार कोरोना सङ्क्रमणबाट मृत्यु हुनेको सङ्ख्या दुई लाख तीन हजार दुई सय ८९ पुगेको छ । हालसम्म कोरोनाभाइरस सङ्क्रमण भएका आठ लाख ३६ हजार नौ सय ७८ जना निको भएका छन् ।

कोरोनाबाट विश्वभरि २९ लाख २१ हजार चार सय ४१ जना सङ्क्रमित भएका छन् । सबैभन्दा बढी अमेरिकामा नौ लाख ६० हजार आठ सय ९६ जना सङ्क्रमित छन् भने ५४ हजार दुई सय ६५ जनाको मृत्यु भएको छ ।

इटलीमा एक लाख ९५ हजार तीन सय ५१ जना कोरोनाभाइरसबाट सङ्क्रमित भएका छन् भने २६ हजार तीन सय ८४ जनाको मृत्यु भएको छ । स्पेनमा दुई लाख २३ हजार सात सय ५९ जना सङ्क्रमित भएकामा २२ हजार नौ सय दुई जनाको मृत्यु भएको छ ।

त्यसैगरी, फ्रान्समा एक लाख ६१ हजार चार सय ८८ जना सङक्रमित भएका छन् भने २२ हजार छ सय १४ जनाको मृत्यु भएको छ । बेलायतमा एक लाख ४८ हजार तीन सय ७७ जना कोरोनाभाइरस सङ्क्रमित भएकामा २० हजार तीन सय १९ जनाको ज्यान गएको छ । भारतमा २६ हजार चार सय ९६ जनामा सङ्क्रमण पुष्टि भएको छ भने आठ सय २५ जनाको मृत्यु भएको छ ।