कोभिड–१९ : अमेरिकामा पाँच लाख भन्दा बढी मानिस सङ्क्रमित, झण्डै ३० प्रतिशत सङ्क्रमित अमेरिकाका

काठमाडौँ । विश्वमा महामारिको रुपमा फैलिएको कोरोना भाइरस (कोभिड–१९)बाट संयुक्त राज्य अमेरिकामा मात्रै पाँच लाख भन्दा बढी मानिस सङ्क्रमित भएका छन् । वल्डवमिटरले सार्वजनिक गरेको पछिल्लो विवरणअनुसार अमेरिकामा कोभिड–१९ बाट पाँच लाख दुई हजार आठ सय ७६ मानिस सङ्क्रमित भएका छन् । जुन विश्वभर सङ्क्रमितको सङ्ख्यामा झण्डै ३० प्रतिशत (२९.५७ प्रतिशत) हो ।

वल्डवमिटर संयुक्त राष्ट्रसङ्घ (युएन) डब्लुएचओ, खाद्य र कृषि सङ्गठन (एफएओ) तथा अन्तर्राष्ट्रिय मुद्राकोष (आइएमएफ) का विज्ञ समूह सहभागी संस्था हो । यस संस्थाले विश्वका विभिन्न तथ्याङ्क सार्वजनिक गर्दै आएको छ ।

कोभिड–१९ को सङ्क्रमणबाट अमेरिकामा १८ हजार सात सय ४७ मानिसले ज्यान गुमाएका छन् । इटलीमा यसबाट १८ हजार आठ सय ४९ मानिसको मृत्यु भएको छ । तर पछिल्लो तथ्याङ्कअनुसार अमेरिकामा कोभिड–१९ बाट सङ्क्रमित हुने र मृत्यु हुनेको सङ्ख्या अन्य देशको भन्दा निकै धेरै छ ।

पछिल्लो २४ घण्टामा अमेरिकामा कोभिड–१९ को सङ्क्रमणबाट दुई हजार ३५ जनाको मृत्यु भएको छ । सोही अवधिमा अमेरिकामा ३३ हजार सात सय ५२ जना नयाँ सङ्क्रमित भेटिएका छन् । पछिल्लो २४ घण्टामा फ्रान्समा नौ सय ८७ जना र बेलायतमा नौ सय ८० जनाको मृत्यु भएको छ । जबकी चीनमा कोभिड–१९ को सङ्क्रमणबाट सोही अवधिमा एक जनाको मात्र ज्यान गएको छ ।

पछिल्लो तथ्याङ्कअनुसार कोभिड–१९ को सङ्क्रमणबाट विश्वमा मृत्यु हुनेको सङ्ख्या एक लाख दुई हजार सात सय ५५ पुगेको हो । सङ्क्रमितको सङ्ख्या १७ लाख तीन सय ७८ पुगेको छ ।