कोरोना सङ्क्रमणबाट विश्वभरीमा २७ हजार भन्दा बढीको मृत्यु, एक लाख तेत्तीस हजारको उपचार

काठमाडौँ । विश्वभरि महामारीका रुपमा फैलिँदै गएको कोरोना भाइरसको सङ्क्रमणबाट मृत्यु हुनेको सङ्ख्या २७ हजार नाघेको छ । पछिल्लो अपडेट अनुसार कोरोना भाइरसको सङ्क्रमणबाट विश्वका विभिन्न देशमा गरी २७ हजार ३ सय ६५जनाको मृत्यु भएको छ ।

विश्वको जनसङ्ख्या र अन्य तथ्याङ्क विश्लेषण र सार्वजनिक गर्दै आएको संस्था वर्ल्डवमिटरले सार्वजनिक गरेको तथ्याङ्कअनुसार संसारभरि पाँच लाख ९७ हजार दुई सय ६२ जना कोरोना भाइरसबाट सङ्क्रमित भएका छन् । सङ्क्रमित व्यक्तिहरुमध्ये एक लाख ३३ हजार तीन सय ६३ जना उपचारपछि घर फर्किएका छन् भने चार लाख ३६ हजार पाँच सय ३४ जना हाल उपचाररत छन् ।

वर्ल्डवमिटर संयुक्त राष्ट्रसङ्घ (युएन) डब्लुएचओ, खाद्य र कृषि सङ्गठन (एफएओ) तथा अन्तर्राष्ट्रिय मुद्राकोष (आइएमएफ) का विज्ञ समूह सहभागी संस्था हो । यस संस्थाले विश्वका विभिन्न तथ्याङ्क सार्वजनिक गर्दै आएको छ । https://www.worldometers.info/coronavirus/

कोरोना भाइरस सङ्क्रमणबाट इटलीमा मात्रै नौ हजार एक सय चौतीस जनाको ज्यान गइसकेको छ । सबैभन्दा बढी सङ्क्रमण अमेरिकामा देखिएको छ । पछिल्लो समय तीब्र रुपमा सङ्क्रमण फैलिइरहेको अमेरिकामा एक लाख चार हजार दुई सय पाँच जना कोरोना सङ्क्रमित भेटिएका छन् । कोरोनाबाट अमेरिकामा एक हजार सात सय एक जनाको ज्यान गइसकेको छ ।