कोरोनाभाइरसबाट ज्यान गुमाउनेको सङ्ख्या २१ हजार नाघ्यो, ४ लाख ७१ हजार सङ्क्रमित

विश्वभरि महामारीका रुपमा फैलिँदै गएको कोरोना भाइरसको सङ्क्रमणबाट विहीबार विहानसम्म विश्वका विभिन्न देशमा गरी २१ हजार २ सय ८३ जनाको मृत्यु भएको छ ।

विश्वको जनसङ्ख्या र अन्य तथ्याङ्क विश्लेषण र सार्वजनिक गर्ने संस्था वल्ड व मिटरले सार्वजनिक गरेको तथ्याङ्कअनुसार संसारभरि ४ लाख ७१ हजार ३५जना कोरोना भाइरसबाट सङ्क्रमित भएका छन् ।

सङ्क्रमित व्यक्तिहरुमा १ लाख १४ हजार २१८ जना उपचारपछि घर फर्किएका छन् भने तीन लाख ३५ हजार ५३४ व्यक्ति हाल उपचारारत छन् । कोरोना भाइरस कोभिड–१९ को सङ्क्रमण हालसम्म १९२ देशमा देखा परिसकेको छ ।

चीनको हुबे प्रान्तको उहान शहरबाट शुरु भएको कोभिड–१९ लाई विश्व स्वास्थ्य सङ्गठनले ‘विश्वव्यापी महामारी’को सङ्ज्ञा दिएको छ । सोही बमोजिम नागरिकलाई सतर्कता अपनाउन पनि विश्व स्वास्थ्य संगठनले विश्वका सबै देशका नागरिकलाई आग्रह गरिरहेको छ ।

कोरोना भाइरस सङ्क्रमणबाट चीनमा ३ हजार २८७ जनाको मृत्यु भएको छ । चीनमा ७४ हजार ५१ व्यक्ति उपचारपछि घर फर्किएका छन् । हाल कोरोना भाइरसका कारण अत्यन्त प्रभावित इटालीमा यस रोगको सङ्क्रमणका कारण ७ हजार ५०३ जनाको मृत्यु भएको छ ।

इरानमा कोरोना भाइरसको सङ्क्रमणका कारण २ हजार ७७ जनाको मृत्यु भएको छ । कोरोना भाइरसको सङ्क्रमणको कारण स्पेनमा ३ हजार ६४७ जनाको मृत्यु भएको छ । स्पेनमा कोरोनाभाइरसको सङ्क्रमणबाट चीनमा भन्दा बढी मानिसको मृत्यु भएको छ ।