बुटवल उपमहानगरपालिकामा क्षतिको विवरण सङ्कलन गर्न समिति गठन

बुटवल, २९ भदौ । जेनजी आन्दोलनको क्रममा बुटवल उपमहानगरपालिकामा भएको भौतिक क्षति विवरण यकिन गर्नका लागि दुई वटा समितिहरू गठन गरिएको छ।

बुटवल उपमहानगरपालिका प्रशासन महाशाखा प्रमुख हरि अर्यालको संयोजकत्वमा उपमहानगरपालिका तथा वार्डहरू भएको जिन्सी सामानहरू विवरण सङ्कलन गर्ने समिति गठन गरिएको हो । त्यस्तै, बुटवल उपमहानगरपालिका वरिष्ठ इन्जिनियर गौतम रौनियारको नेतृत्वमा क्षतिको मूल्याङ्कन यकिन गर्ने प्राविधिक समिति गठन गरिएको छ ।

उपमहानगरपालिकाका प्रवक्ता शिव रानाले दुई वटा समिति गठन गरेर क्षतिको अवस्था र विवरण तयार गर्ने जिम्मा दिइएको रातोपाटीलाई बताए । उनले ती दुवै समिति काम सुरु गरिसकेको र छिटै प्रमुख प्रशासकीय अधिकृत समक्ष प्रतिवेदन बुझाउने बताए ।

बुटवल उपमहानगरपालिकामा आन्दोलनकारीले आगजनी गरेपछि सेवा अवरुद्ध भएको छ । उनले कार्यालय खुल्न अझै केही दिन लाग्न सक्ने बताए। प्रवक्ता रानाले आज नगरपालिकाका पदाधिकारीहरू जुटेर प्रमुख जिल्ला अधिकारीसँग कसरी कार्यालय सञ्चालन गर्ने बारे थप छलफल गर्ने जानकारी दिए।