‘शासकको दम्भ र घुसपैठले जेनजी आन्दोलन हिंसात्मक बन्यो’

काभ्रे, २७ भदौ । नेकपा (माओवादी केन्द्र), काभ्रेले भदौ २३ र २४ गते भएको जेनजी आन्दोलन शासकहरूको दम्भ, घमन्ड र आन्दोलनमा भएको घुसपैठका कारण हिंसात्मक बन्न पुगेको आरोप लगाएको छ ।

शुक्रबार एक प्रेस विज्ञप्ति जारी गर्दै पार्टीले जेनजी समूहका मागहरू जायज भए पनि त्यसलाई गलत तत्त्वहरूले हिंसात्मक बनाएर देशलाई अपूरणीय क्षति पुर्‍याएको ठहर गरेको हो ।

पार्टीका जिल्ला संयोजक भोला प्रसाद अर्याल र केन्द्रीय सदस्य तथा जिल्ला इन्चार्ज तेज बहादुर मिजारद्वारा हस्ताक्षरित विज्ञप्तिमा जेनजी समूहका मागप्रति नैतिक समर्थन भए पनि हिंसात्मक गतिविधि अस्वीकार्य भएको उल्लेख छ । जेनजी समूहले उठाएका एजेन्डा माओवादी केन्द्रकै भएको र विगतमा आफ्नो नेतृत्वको सरकारले यसलाई कार्यान्वयन गर्न खोज्दा सरकारबाटै बाहिरिनुपरेको विज्ञप्तिमा स्मरण गराइएको छ ।

पार्टीले हिंसात्मक गतिविधिमा संलग्नलाई पहिचान गरी कारबाही गर्न र देशको वर्तमान संकट समाधानका लागि सबै लोकतान्त्रिक शक्तिहरूलाई एक हुन अपिल गरेको छ ।

‘शासकको दम्भ, घमन्ड र हठका कारण मुलुकमा अपूरणीय मानवीय क्षतिसहित देशको ऐतिहासिक तथा पुरातात्त्विक संरचनामा क्षति भएको छ । पार्टीले आन्दोलनलाई कमजोर बनाउन चाहने अवाञ्छित तत्त्वले युवा र विद्यार्थीलाई उत्तेजित गराएको हो,’ विज्ञप्तिमा भनिएको छ ।